Daði og Hrefna nýir deildar­stjórar hjá Veitum

Á vef Veitna segir að Hrefna og Daði séu nýir deildarstjórar á sviði Vatnsmiðla en sviðið beri meðal annars ábyrgð á því að tryggja aðgengi að heitu og köldu vatni ásamt fráveitu á veitusvæðunum. Þau hafi þegar hafið störf.

„Daði er deildarstjóri reksturs Vatnsmiðla og bættist í hópinn fyrr á árinu. Daði kemur til Veitna frá HBH Byggir ehf. þar sem hann starfaði sem framkvæmdastjóri. Daði hefur áratuga reynslu af stjórnun og rekstri fyrirtækja í framleiðslu, orkuiðnaði og stóriðju.

Hrefna tók við starfi deildarstjóra fjárfestinga Vatnsmiðla. Hún kemur til Veitna frá Marel þar sem hún starfaði sem stjórnandi í vöruþróun og á fjármálasviði. Hrefna hefur langa reynslu af stjórnun og verkefnastýringu í alþjóðlegum fyrirtækjum í matvælavinnslu, lyfjaiðnaði og líftækni,“ segir á vef Veitna.