Fyrir ykkur

Kæru vinir. Flokkur fólksins hefur lagt hjarta sitt í þessa kosningabaráttu, þar er allt undir. Ég hef lagt mig alla fram undan farnar vikur, sem og mínir dásamlegu vinir og félagar á listanum. Ásta Lóa Þórsdóttir sem með þrautseigju sinni og einmuna elju hefur unnið stórsigur, Sigurður Helgi Pálmason í öðru sæti fer að öllu líkindum með henni á þing. Fullkomlega verðugur fulltrúi Reykjanesbæjar, bæjar sem rær lífróður og þarf nauðsynlega að fá sína rödd inn á Alþingi.

Ég í þriðja sæti er sögð, mögulega geta verið vongóð um sæti sem þingmaður, en ég er ykkur að segja alveg sultuslök yfir því. Hlutirnir hafa tilhneigingu til að fara eins og þeir fara, en ég myndi að sjálfsögðu einhenda mér af fullri einlægni í það göfuga starf, ef að yrði. Færi í það með hjarta mínu og af hugsjón alla leið, með hagsmuni heimabyggðar minnar Þorlákshöfn og Ölfus í forgrunni.

Mín einlæga von er sú, að önnur kosning, sem skiptir mig ekki minna máli verði felld á kjördag. Heidelberg Materials er alþjóðarisi sem sýnt hefur sig í að vera hörmulegur granni annara samfélaga í formi stórra og mengandi grjótmulningsverksmiðja, vill nú planta einni slíkri niður, alveg við fallega heimabæinn minn, í göngufæri við búðina, og ennþá nær nýja leikskólanum okkar.

Þorlákshafnarbúar hafa barist svo hart gegn þeim áformum að aðdáunarvert verður að teljast. Ég er afar stolt að tilheyra svo frábæru og réttsýnu samfélagi. Húrra fyrir öllum þeim sem hafa látið vel í sér heyra og allar góðar vættir gefi að við berum gæfu til að fella þetta næstkomandi laugardag, landsins og afkomenda okkar vegna.

Jónas Yngvi Ásgrímsson er í fjórða sæti á lista Flokks fólksins í Suður hann er ykkur að segja, algjör meistari, hann myndi setjast á Alþingi með reisn og afburða kunnáttu sína, kæmi til þess.

Flokkur fólksins státar af einvala og samtaka fólki sem öll vinna að því sama, ábyrgum stefnumálum Flokks FÓLKSINS og ávallt út frá hagsmunum þegna þessa lands og heimilanna. Við berjumst fyrir hópa sem minna mega sín fátæka, fátæka eldri borgara og öryrkja. Fyrir gjörbyltu heilbrigðiskerfi um land allt, að efla heilsugæslur, úrræði fyrir geðsjúka, sem alltaf virðast lenda á veggjum í kerfinu, réttlæti fyrir Brca-bera sem reka sig á kostnaðarsamar hindranir ofan í grafalvarlegar stökkbreytingar í genum sem margfalda líkur á krabbameini. Fyrir helsjúka sem horfa framan í það að vera deyjandi, þurfa að reiða upp budduna aftur og aftur, ofan í það reiðarslag sem fylgir fyrirliggjandi ótímabærum dauða. Við viljum minnka álag á heilbrigðisstarfsfólk og setja mannúðarsjónarmið í forgang, kerfið á að vera hlýlegt og opið, ekki kalt og lokað þegar kemur að því að sjúkt fólk þarf að nýta sér það.

Eflum á ný landsbyggðina með því að stórauka strandveiðar sem hleypa á ný lífi í sjávarþorp og hlúum bændastéttinni með öllum ráðum. Raforkuverð til garðyrkjubænda stefnir nú í að verða hækkað um 20% um næstu áramót og sennilega annað eins ári seinna. Þessu verðum við að bregðast við. Bætum samgöngur, borum jarðgöng, byggjum brýr og komum hringveginum í sómasamlegt horf.

Flokkur fólksins hefur þegar unnið fádæma þrekvirki, þrátt fyrir að vera í stjórnarandstöðu, hugsið ykkur hverju væri hægt að koma í verk ef við kæmist til áhrifa. Það yrði hreinsað til og sópað, það er þegar komin titringur í suma valdamenn vegna þess. Inga Sæland mun ekki gefa eftir neinu þegar kemur að okkar kjarnamálum, svo það er full ástæða fyrir embættiskerfið og aðra flokka að virða okkar markmið og fyrir kjósendur að styðja okkar baráttu!

Ég vil þakka öllum þeim sem að ég hef hitt í þessari stuttu kosningabaráttur fyrir einlægt og hlýlegt viðmót, hlakka til að hitta ykkur sem eftir eru, þetta tímabil hefur verið mér einstaklega dýrmætur skóli frá fyrsta degi.

Áfram Flokkur fólksins, flokkurinn þinn. Við munum afnema verðtrygginguna, fyrirmynd þeirrar aðgerðar er þegar orðin til í húsnæðislánakerfi Danmerkur.

Það er að lokum ein ófrávikjanleg krafa Flokks fólksins. Öll laun upp að 450.000 skulu vera skatta og skerðinga laus. Prinsipp mál sem Flokkur fólksins víkur ekki frá, enda er vel hægt að efna það loforð.

Höfundur skipar 3. sæti á lista Flokks fólksins í Suðurkjördæmi.