Fær meira fyrir að tala í hálf­tíma en fyrir heilt tíma­bil í WNBA

Clark sló í gegn á sínu fyrsta tímabili í WNBA og vakti áður óþekktan áhuga á deildinni. Clark var valinn nýliði ársins með næstum því öllum greiddum atkvæðum og fjölmörg áhorfs- og áhorfendamet voru slegin á leikjum liðs hennar, Indiana Fever.

Mikil eftirspurn er eftir Clark og hún kann greinilega að nýta sér það. Hún býður nefnilega upp á fyrirlestra í gegnum fjarfundarbúnað. Fyrir hálftíma fyrirlestur rukkar hún hundrað þúsund dollara, eða 13,9 milljónir íslenskra króna.

Það er meira en Clark fékk í laun fyrir að spila með Indiana á síðasta tímabili. Talið er að hún sé með 76.535 dollara í laun, eða 10,6 milljónir íslenskra króna.

Þótt launin séu ekki há miðað við launin í karlaboltanum þarf Clark ekki að hafa áhyggjur af því að eiga ekki fyrir salti í grautinn. Hún er með alls konar styrktarsamninga og hefur nú þegar haldið sex fyrirlestra sem hafa skilað henni sex hundruð þúsund dollurum. Það gera rúmlega 83 milljónir íslenskra króna.