Telja Seyðis­fjörð þola tíu þúsund tonn af eldis­laxi

Þetta kemur fram í tilkynningu á vef MAST, en þar segir að um sé að ræða ný rekstrarleyfi sem heimili annars vegar eldi á 6.500 tonnum af frjóum laxi og hins vegar 3.500 tonnum af ófrjóum laxi í firðinum.

Meira en helmingur verði frjór lax

„Burðarþolsmat Hafrannsóknastofnunar fyrir Seyðisfjörð gerir ráð fyrir að hægt sé að vera með allt að 10.000 tonna lífmassa í eldi í firðinum. Áhættumat erfðablöndunar Hafrannsóknastofnunar gerir hins vegar eingöngu ráð fyrir að hægt sé að vera með 6.500 tonn af frjóum laxi í firðinum og því eru tvö leyfi auglýst,“ segir í tilkynningunni. 

Frestur til þess að skila inn athugasemdum við tillöguna er til 20. janúar næstkomandi, en þær skulu sendar á mast@mast.is, merktar 18081324.

Umdeilt mál

Áform um sjókvíaeldi í Seyðisfirði eru nokkuð umdeild, en í síðasta mánuði var greint frá því að samkvæmt könnun sem Gallup gerði væri mikill meirihluti andvígur framkvæmdinni, þar sem 61,1 prósent lýsti neikvæðri afstöðu til hennar.

Í byrjun árs 2023 var samkvæmt tölfræðilega marktækri skoðanakönnun sem Múlaþing lét gera 75 prósent íbúa andvígur þessum áformum sem er mikill meirihluti.