Guardiola var á undan Haaland með stóru fréttirnar

Haaland skoraði í langþráðum sigri Manchester City í ensku úrvalsdeildinni í gær og eftir leikinn fór Pep Guardiola, knattspyrnustjóri City, í viðtal við enska fjölmiðla. Hann var spurður út í norska framherjann.

Haaland tilkynnti það sjálfur í október að hann og kærasta hans Isabel Haugseng Johansen ættu von á barni. Nú er það komið í heiminn. Hún er tvítug en Haaland 24 ára.

Enskir fjölmiðlar eins og Guardian fengu fréttirnar frá Pep eftir sigurinn í gær.

„Stundum hefur Erling fengið á sig of harða gagnrýni en það er bara hluti af fótboltanum. Hann er þreyttur og hefur spilað margar mínútur,“ sagði Guardiola og hélt áfram:

„Hann varð faðir í fyrsta sinn fyrir nokkrum dögum. Því fylgja miklar tilfinningar og þetta hafa verið spennandi dagar fyrir hann,“ sagði Guardiola.

Haaland hafði ekki skorað í sex af síðustu sjö leikjum og klikkaði á vítaspyrnu í leiknum á undan.

Hann skoraði aftur á móti í fyrsta leiknum eftir að hann varð faðir í fyrsta sinn.