Pep stað­festir að Wal­ker vilji fara í janúar

Kyle Walker er fyrirliði Manchester City en hann kom til félagsins frá Tottenham árið 2017 og verið hluti af sigurliði Pep Guardiola síðustu árin.

Walker var ekki í leikmannahópi City þegar liðið vann 8-0 sigur á Salford í enska bikarnum í dag og eftir leik var knattspyrnustjórinn Pep Guardiola spurður út í fjarveru Walker og staðfesti þá að Walker hefði óskað eftir því að fá að yfirgefa félagið.

„Þetta er ekki auðvelt fyrir mig en Kyle er ekki hérna því fyrir tveimur dögum óskaði hann eftir því að fá að yfirgefa City og spila erlendis. Hann spurði um það sama eftir þrennuna, þegar Bayern vildi fá hann, en tilboðið þá var ekki nógu gott.“

„Af þeirri ástæðu vill ég frekar spila leikmönnum sem eru með hugann hérna. Kyle fór til Txiki Begiristain [Yfirmaður knattspyrnumála Manchester City]. Kannski hef ég rangt fyrir mér en ég er nokkuð viss um að þú ættir ekki að halda neinum sem vill ekki vera hérna,“ sagði Guardiola í viðtali eftir leikinn.

„Han vill skoða það að spila í öðru landi á síðustu árum ferilsins, af ýmsum ástæðum.“

Unnið sautján stóra titla

Mikið hefur gengið á í einkalífinu hjá Walker að undanförnu en á síðasta ári skildi hann við eiginkonu sína eftir að upp komst að önnur kona hefði eignast tvö börn með Walker á meðan hjónabandi hans stóð.

Félagaskiptaglugginn í Englandi er opinn og líklegt að ósk Walker sé sett fram til að auka líkurnar á að félagaskiptin gangi í gegn sem fyrst.

Guardiola segir ekki hægt að tala um velgengni City síðustu árin án þess að nefna Kyle Walker sem unnið hefur sautján stóra titla á ferli sínum með félaginu.

„Að vera með hægri bakvörðin eins og hann gaf okkur eitthvað sem við vorum ekki með og hann hefur verið ótrúlegur. En hann sagði, að af fullum huga og hjarta langaði hann að skoða aðra möguleika.“