Ferðalangar taki mið af hríð og hvössum vindum

Lovísa Arnardóttir skrifar 3. febrúar 2025 09:16

Einar Sveinbjörnsson veðurfræðingur segir ferðalanga verða að skoða veðurspá vel áður en þeir leggja af stað í langferðir í dag. Vísir

Einar Sveinbjörnsson hjá blika.is og Vegagerðinni segir þetta tíma djúpra vetrarlægða. Íbúar á Norðurlandi, Skagafirði og Eyjafirði, geti átt von á því að það geri talsvert mikinn hvell um kvöldmatarleytið.

„Það verður bæði hvasst og sviptivindasamt,“ segir Einar en hann fór yfir veðrið í Bítinu á Bylgjunni í morgun.

Gular og appelsínugular viðvaranir eru í gildi eða munu taka gildi siðar í dag um land allt. Um klukkan 16 verða viðvaranir í gildi um land allt og verða í gildi til um miðnættis. Appelsínugul viðvörun er þegar í gildi á Austfjörðum en taka gildi klukkan 12 á Austurlandi, klukkan 16 á Vestfjörðum og klukkan 17 á Ströndum og Norðurlandi vestra og Norðurlandi eystra.

Átök í loftunum beggja vegna við okkur

Einar segir lægðina fara norður yfir landið og stefna á Grænland og grynnist hratt. Á morgun taki við dimmur éljagangur. Hann segir átök í loftunum beggja vegna við okkur og þrýstiöfgar.

„Á sama tíma og við erum með þessa djúpu lægð hér fyrir norðan land er loftþrýstingur að verða mjög hár yfir Skandinavíu,“ segir Einar og að svalt loft úr vestri sæki yfir Atlantshafið.

„Og við lendum á þessu átakasvæði,“ segir hann og að það verði sviptingar í bæði vinda og hitastigi.

Það verði ekki mjög kalt við þessar aðstæður og það líti út fyrir að þessi átök standi fram að næstu helgi og jafnvel lengur.

Hann segir þennan lægðagang ekki óeðlilegan miðað við árstíma en hann geti verið hvimleiður fyrir okkur. Hann segir nokkuð mikið rými fyrir miklar sveiflur í veðri og það þurfi að ganga langt svo það geti talist óeðlilegt. Á síðasta ári hafi þó veðrið verið óeðlilegt að því leytinu til að það hafi verið norðanátt í nánast þrjá mánuði síðari hluta sumars.

Gæti dottið í dúnalogn um miðjan mánuð

Hann segir sumar spár gera ráð fyrir því að um miðjan febrúarmánuð detti allt í dúnalogn en setur þó þann fyrirvara á að þær spár byggi á mjög veikum forsendum eins og er.

Einar segir að þegar kólnar í kjölfar lægðarinnar muni því fylgja nokkur hríð og það sé aldrei gott að vera á ferðinni þegar það fer saman hríð og mikill vindur.

„Það er mjög mikilvægt að fólk sem hyggur á langferðir á þessum árstíma. Það er ekki bara stuttur dagurinn, það eru líka sviptingar í veðrinu, og mikilvægt að menn fylgist mjög vel með og viti hvað þeir eru að gera.“

Veður Færð á vegum Bítið

Mest lesið

Fleiri fréttir