Fella fjögur­hundruð tré í von um að flug­braut fáist opnuð

Við sáum flugmenn í krefjandi hliðarvindslendingum í síðustu viku. Þá munaði litlu að flugvöllurinn lokaðist alveg þegar hvass austanstrekkingur stóð þvert á einu nothæfu braut vallarins. Samkvæmt veðurspá gætu aftur myndast tvísýnar aðstæður næstu daga.

Níu dagar eru frá því flugbrautinni var lokað og núna heyrast sagarhljóðin í Öskjuhlíð. Skógarhöggsmenn borgarinnar voru mættir til starfa á ný í dag eftir vinnuhlé um helgina, eins og sjá mátti í fréttum Stöðvar 2.

„Við fengum sem sagt áætlun á föstudaginn frá Isavia. Hún lítur þannig út að við erum þá með um fjögurhundruð tré undir og eru núna í þessum töluðu orðum að búa til áætlun um hvernig við ætlum að gera það,“ segir Hjalti Jóhannes Guðmundsson, skrifstofustjóri borgarlandsins hjá Reykjavíkurborg.

Það er til viðbótar þeim 160 trjám sem þegar er búið að fella undanfarna daga. Hjalti segir að varlega sé farið í verkefnið. Gæta þurfi að því að Öskjuhlíðin nýtist áfram sem gott útivistarsvæði.

„Við viljum nefnilega gera það. Og við viljum vernda skógarbotninn eins mikið og við mögulega getum vegna þess í framtíðinni á þetta náttúrlega að vera þá bara fallegt og flott útivistarsvæði, sem allir eiga að geta notið.“

-En það er samt mikil pressa á þessu máli og þið finnið hana?

„Við finnum hana svo sannarlega og við vinnum þetta mjög faglega. Við erum með þrjá skógfræðimenntaða einstaklinga sem stýra þessu verkefni fyrir okkur og eru að stjórna fellingunni. Og líka bara aðferðafræðinni við fellinguna og meta hverju sinni hvernig í raun og veru við getum unnið þetta.“

Menn binda vonir við að það dugi að fella þessi fjögurhundruð tré til að unnt verði að opna flugbrautina en þá með takmörkunum. Þá verði að minnsta kosti unnt að opna brautina fyrir sjónflug og jafnvel einnig fyrir sjónflug í myrkri þannig að nota megi aðflugshallarljós.

Hjalti segir framvindu verksins næstu daga ráðast af ýmsum þáttum, þar á meðal veðri.

„Það er ekki hægt að segja að þetta sé bara færiband; x-mörg tré á dag. Þetta er ekki svoleiðis verkefni.“

-En svona raunsætt mat: Hvenær finnst þér líklegt að þetta gæti klárast?

„Vika-tíu dagar, kannski eitthvað svoleiðis. Það er pínu óábyrgt. En samt. Eigum við ekki bara að slá því fram áður en lengra er haldið,“ svarar Hjalti Jóhannes Guðmundsson.

Hér má sjá frétt Stöðvar 2: