Heimar kaupa um­deild hús á rúma sex milljarða

Í tilkynningu Heima til Kauphallar segir að seljendur séu MF2 hs. og Laxamýri ehf.. MF2 hs. er sjóður í stýringu Ísafold capital cartners og Laxamýri ehf. er í eigu Georgs Gíslasonar, Hjalta Gylfasonar og Jónas Más Gunnarssonar. Tveir síðarnefndu eru stofnendur verktaka- og ráðgjafarfyrirtækisins Mannverks.

Jónas Már var sakfelldur árið 2019 fyrir fyrir brot gegn lögum um menningarminjar og lögum um mannvirki eftir að Exeter-húsið við Tryggvagötu 12 var rifið. Honum var gert að greiða þrjár milljónir króna í sekt. 

Þetta segir Ólafur Þór Hauksson í samskiptum við Vísi en dómur yfir Jónasi Má er hvergi finnanlegur á vef dómstólanna.

5.500 fermetrar

Í tilkynnningu segir að heildarfermetrafjöldi fasteignanna sé um 5.500 feremetrar. Fasteignirnar séu heilar nýlegar eignir byggðar árið 2018 og séu staðsettar innan skilgreindra kjarnasvæða Heima. Kaupin samræmist því stefnuáherslum félagsins.

Um sé að ræða kaup á 106 herbergja, 4 stjörnu hóteli í miðborg Reykjavíkur og aðliggjandi skrifstofubyggingu. Exeter hótel hafi á síðustu misserum fest sig í sessi sem eitt af bestu hótelum borgarinnar og það sé staðsett á eftirsóttum stað með einstakt útsýni yfir höfnina. Hótelið búi yfir framúrskarandi staðsetningu, nútímalegri hönnun og gæðaþjónustu, sem tryggi hátt nýtingarhlutfall og verðmætasköpun til framtíðar.

Eignirnar séu í útleigu og leigutakar í eignunum séu Exeterhouse ehf., rekstraraðili Exeter hótels, og Aton.

Tæplega hálfur milljarður á ári

Þá segir að heildarvirði viðskiptanna sé samkvæmt kaupsamningi 6,375 milljarðar króna. Kaupverð greiðist að fullu með reiðufé og yfirtöku skulda.

Stjórnendur Heima áætli að áhrif kaupanna á EBITDA félagsins á ársgrundvelli verði 454 milljónir króna í kjölfar viðskipta.

Kaupsamningurinn sé háður ýmsum fyrirvörum, meðal annars um niðurstöðu áreiðanleikakannana og samþykki Samkeppniseftirlitsins.

Hús frá 1904 fékk að fjúka

Exeter hótelið dregur nafn sitt af Exeter-húsinu svokallaða, sem stóð við Tryggvagötu 12 frá árinu 1904 til ársins 2016, þegar það var rifið í skyndi.

Byggingarfulltrúi Reykjavíkur sagði á sínum tíma að hann væri öskureiður yfir því að Mannverk hefði mætt á svæðið með stórvirkar vinnuvélar og rifið húsið. Embættið hafi kært málið til lögreglu.

Mannverk hafði þó leyfi til þess að rífa húsið að hluta vegna endurbóta sem ætlaðar voru á því. Til stóð að endurbyggja bæði Tryggvagötu 10 og 12 í upprunalegri mynd en með viðbótum, kjallara og aukahæð samkvæmt gildandi deiliskipulagi.

Fréttin hefur verið uppfærð.