Kristianstad byrjar vel í bikarnum

Guðný Árnadóttir, Alexandra Jóhannsdóttir og Katla Tryggvadóttir léku allan leikinn fyrir Kristianstad í dag. Sú síðastnefnda var nýlega gerð að fyrirliða Kristianstad þrátt fyrir að vera aðeins nítján ára.

Staðan í hálfleik í leiknum í dag var markalaus. Á 59. mínútu kom Remy Siemsen Kristianstad yfir og níu mínútum síðar jók Alice Nilsson forskotið í 2-0.

Ella Reidy minnkaði muninn á 74. mínútu en nær komst AIK ekki. Kristianstad fagnaði því góðum sigri, 2-1.

Leikið er í fjórum fjögurra liða riðlum í sænsku bikarkeppninni. Sigurvegarar riðlanna fjögurra komast í undanúrslit.