Grunnskólarnir pöntuðu fjögur þúsund pizzur

Þetta er meðal þess sem fram kemur í tilkynningu frá pizzastaðnum. Þar segir að fyrir hádegi í dag hafi starfsfólk allra verslana verið á fullu. Gerðar hafi verið um fjögur þúsund pizzur til að senda í grunnskólana á höfuðborgarsvæðinu. Gera megi ráð fyrir að um þrettán til fimmtán þúsund nemendur hafi gætt sér á Domino’s pizzu í hádeginu. Vísi telst því til að pantaðar hafi verið pizzur fyrir rúmar tíu milljónir króna. 

Pizzan þurfi ekki að vera óholl

Ásmundur Atlason markaðsstjóri Domino's segir í samtali við Vísi málið sýna fram á sérstöðu keðjunnar hér á landi. Fáir staðir geti tekið við viðlíka magni pantanna og komið á alla staði fyrir hádegi.

„Svo hjálpumst við öll að og líka við fólkið á skrifstofunni, við hjálpuðum til og fórum meðal annars með sendingu í Kársnesskóla. Það er geðveikt að labba inn með pizzur í skólana þar sem allt er fullt af krökkum í búningum, þetta er klárlega orðin hefð,“ segir Ásmundur.

Spurður hvort einhverjir foreldrar séu ekki hvumsa yfir því að börn þeirra úði í sig pizzum í hádeginu í skólanum bendir Ásmundur á að það sé algengur misskilningur að pizza þurfi að vera óholl. Hann segir það enn lifa í sinni minningu þegar pöntuð hafi verið pizza í skólann.

„Þetta snýst allt um að hafa gaman, sérstaklega á degi sem þessum, að fagna Öskudeginum almennilega og þá er frábært að gera sér dagamun og panta pizzu,“ segir Ásmundur sem segir ljóst að þetta sé töluverður fjöldi af skólum sem haldi í þessa hefð á Öskudegi.

Brauðstangir og árshátíð í kvöld

Í tilkynningu frá pizzastaðnum kemur fram að auk þessa hafi myndast sú hefð að gefa þeim krökkum sem mæti í verslanir Domino's á Öskudegi að syngja brauðstangir. Steinar Bragi Sigurðsson forstjóri lætur hafa eftir sér að það sé frábært hvað Öskudagur sé líflegur hjá Domino's.

„Starfsfólk Domino‘s stóð sig frábærlega, enda sérfræðingar í að takast á við svona áskoranir og vinna undir álagi. Við erum einstaklega stolt af því að getað klárað svona stórar pantanir og hversu vel þetta gekk,“ segir Steinar Bragi.

Þá kemur fram í tilkynningunni að eftir annasaman dag ætli starfsfólk Domino's að gera sér glaðan dag í kvöld. Haldin verður árshátíð og því munu allar Domino’s verslanir loka kl. 17:00 í dag.