Sænska stór­veldið keypti Ísa­bellu Söru

Hin 18 ára gamla Ísabella Sara gekk í raðir Vals árið 2023 frá uppeldisfélagi sínu KR. Hún varð Íslandsmeistari með Val sama ár. Á síðasta tímabili varð hún svo bikarmeistari. Skammt er síðan að hún framlengdi samning sinn við Val sem nú hefur hins vegar komist að samkomulagi við sænsku meistarana um sölu.

„Rosengård er einn stærsti klúbburinn í Skandinavíu kvennamegin og því ljóst að þetta er frábært tækifæri fyrir Ísabellu. Hún framlengdi samningi sínum við okkur um fjögur ár á dögunum en þetta er tækifæri sem býðst ekki á hverjum degi. Við erum afskaplega ánægð fyrir hennar hönd,“ segir Björn Steinar Jónsson formaður knattspyrnudeildar Vals, í tilkynningu.

Hin sóknarþenkjandi Ísabella Sara skoraði sex mörk á síðasta tímabili. Hjá Rosengård hittir hún fyrir landsliðskonuna og miðvörðinn Guðrúnu Arnarsdóttur.

„Eitthvað sem ég hef alltaf viljað gera“

Alls hefur Ísabella Sara spilað 43 leiki fyrir yngri landslið Íslands. Þar af tvo fyrir U-23 ára landsliðið þrátt fyrir ungan aldur.

„Ég er virkilega ánægð með að koma til FC Rosengård. Að spila erlendis er eitthvað sem ég hef alltaf viljað gera. Sænska deildin er mjög sterk - það er líkamlegur styrkur og hraði hérna, svo það verður gaman,“ segir Ísabella við heimasíðu Rosengård.

Hún mun klæðast treyju númer tíu og má spila strax í næsta leik Rosengård sem er við Växjö á laugardaginn.

Rosengård er eins og fyrr segir ríkjandi meistari í Svíþjóð og leikur því í Meistaradeild Evrópu. Liðið, sem áður hét Malmö, hefur unnið fjórtán meistaratitla og þar af fjóra af síðustu sex. Rosengård hefur komist í riðlakeppni Meistaradeildarinnar síðustu tvö ár.