Segir að það hafi ekki verið mis­tök að selja Elanga

Sænski kantmaðurinn hefur leikið einkar vel fyrir Forest í vetur og á stóran þátt í því að liðið er í 3. sæti ensku úrvalsdeildarinnar og komið í undanúrslit bikarkeppninnar.

Forest keypti Elanga frá United fyrir tveimur árum. Hann gerði gamla félaginu sínu grikk í gær þegar hann skoraði eftir mikinn sprett fram völlinn strax á 5. mínútu.

Eftir leikinn var Amorim spurður að því hvort forveri hans í starfi, Erik ten Hag, hefði gert mistök með því að losa sig við Elanga.

„Við tölum mikið um það sem menn sem voru hjá United eru að gera en þeir fengu tækifæri hérna,“ sagði Amorim.

„Hjá Manchester United hefurðu ekki tímann. Ég fæ ekki tíma. Við verðum að laga hlutina strax. Við erum ekki að tala um leikmenn sem spiluðu ekki fyrir United. Þeir spiluðu hérna. Stundum er pressan hérna of mikil, stundum færðu ekki tímann og þú ættir að fá tíma til að þessir ungu leikmenn geti þroskast. En þú þarft traustan grunn og ef þú hefur hann ekki getum við ekki hjálpað þessum krökkum. Þeir fengu sín tækifæri og stundum er fótboltinn þannig og pressan að spila fyrir Manchester United er mikil.“

Elanga hefur skorað sex mörk og lagt upp átta í ensku úrvalsdeildinni í vetur. Hann hefur alls komið að 28 mörkum á tveimur tímabilum með Forest.

Elanga, sem verður 23 ára í lok mánaðarins, lék alls 55 leiki fyrir United, flesta undir stjórn Ralfs Rangnick, og skoraði fjögur mörk. Hann fékk fá tækifæri hjá Ten Hag og var svo seldur til Forest sumarið 2023.