Landsliðskonum borist skila­boð og sagðar styðja Ísrael

Fjölmargur hefur gagnrýnt komandi leiki vegna framgangs Ísraela gagnvart Palestínumönnum undanfarna mánuði og ásakana um þjóðarmorð.

Nú síðast Kristinn Hrafnsson, ritstjóri WikiLeaks sem kallar eftir því í opnu bréfi til íslenska landsliðsins að leikmenn spili ekki fyrirhugaða leiki á morgun og hinn.

„Á morgun er áformað að þið leikið landsleik við fulltrúa þjóðarmorðingja í Ísrael sem hafa framið - og eru enn að fremja - versta ódæðisverk okkar daga. Þið eruð að fara að leika við konur sem hafa það á sinni samvisku að hafa tekið þátt í þjóðarmorði. Tugþúsundir saklausra borgara hafa verið myrtir, meirihlutinn eru konur og börn, segir Kristinn.

„Þær mæta inn á völlinn með blóð barna á höndunum og þaðan mun það blóð berast til ykkar þegar boltinn fer á milli – ef þið leikið á móti þeim,“ segir Kristinn enn fremur.

Leikirnir fara fram fyrir luktum dyrum á Ásvöllum í samræmi við tilmæli lögreglunnar á höfuðborgarsvæðinu. Áhættugreining lögregluembættisins segi til um að vísast sé að áhorfendum verði ekki hleypt á leikinn.

Auglýsingum vegna leiksins hefur þá verið haldið í lágmarki, sem og aðgengi fjölmiðla að leikmönnum liðsins.

Leikmönnum borist skilaboð á samfélagsmiðlum

Perla Ruth Albertsdóttir, leikmaður Selfoss og íslenska landsliðsins, átti að spila leikina tvo en dró sig úr hópi Íslands í vikunni þar sem hún er ólétt. Perla snerti á leikjunum og aðdraganda þeirra í samtali við Silju Úlfarsdóttur í hlaðvarpinu Klefinn.

„Við leikmenn höfum lítið verið að spá í þessu. HSÍ er bara að sjá um þetta og við leik­menn erum að hugsa um að spila þessa leiki og kom­ast á HM. Sig­ur­veg­ar­inn kemst á HM og það er það eina sem við erum að hugsa um,“ segir Perla Ruth.

Perla greinir frá því að leikmönnum hafi borist ýmis skilaboð og merkingar á samfélagsmiðlinum Instagram.

„Þetta er smá flókið út af þessu Ísraelsdæmi og það voru ákveðnir leik­menn í liðinu fengu skila­boð þegar það var dregið. Við vor­um taggaðar í mynd­bönd á In­sta­gram um að þess­ir leik­menn (íslenska landsliðsins) væru að styðja Ísra­el því við ætluðum að spila þessa leiki. Við vor­um taggaðar í ljót mynd­bönd af stríðsástand­inu,“

„Við leik­menn erum bara að hugsa um leik­inn, ætl­um að mæta klár­ar, spila hand­bolta og koma Íslandi á HM,“ segir Perla Ruth enn fremur.

Fyrri leikur liðanna fer fram í tómum Ásvöllum annað kvöld klukkan 19:30 og sá síðari í sömu höll sólarhring síðar.