Skaga­menn og Sel­fyssingar í sex­tán liða úr­slit

ÍA og Selfoss bættust þar með í hópinn með ÍBV, Kára, Víkingi Ó., Keflavík og Aftureldingu sem komust þangað í gær. ÍA sló út Gróttu á Seltjarnarnesi en Selfoss vann Haukana á Selfossi.

ÍA vann 4-1 sigur á Gróttu. Ómar Björn Stefánsson skoraði tvívegis fyrir Skagaliðið í leiknum.

Viktor Jónsson kom Skagamönnum í 1-0 á 38. mínútu og Ómar Björn Stefánsson bætti við marki eftir fjögurra minútna leik í seinni hálfleik.

Caden Robert McLagan minnkaði muninn í 2-1 á 53. mínútu en Ómar kom Skagamönnum aftur tveimur mörkum yfir aðeins tveimur mínútum síðar.

Fjórða mark Skagamanna skoraði varamaðurinn Gísli Laxdal Unnarsson á 63. minútu og úrslitin voru ráðin.

Lengjudeildarlið Selfoss vann 4-0 sigur á C-deildarliði Hauka á heimavelli sínum.

Elvar Orri Sigurbjörnsson og Frosti Brynjólfsson komu Selfyssingum í 2-0 á fyrstu 26 mínútum leiksins. Elvar Orri skoraði síðan þriðja markið á 68. mínútu og gerði endanlega út um leikinn.

Selfyssingar voru ekki hættir því aðeins tveimur mínútum síðan var staðan orðin 4-0 eftir mark frá fyrirliðanum Ívani Breka Sigurðssyni. Það urðu lokatölur.

Völsungur og Þróttur gerðu 2-2 jafntefli og þar stendur framlenging yfir. Heimamenn komust í 2-0 en Þróttarar jöfnuðu í lok leiks.