„Ég er bara svo fúll út í okkur sjálfa“

„Ég á bara eftir að átta mig á þessu, við bara hendum þessu frá okkur. Stutta útgáfan er þannig,“ sagði Jóhann Þór í samtali við Andra Má Eggertsson eftir leikinn í kvöld. 

„Við töpum tuttugu og tveimur boltum í leiknum og það er erfitt að koma orðum á þetta. Algjör aulaskapur en Stjarnan gerir ágætlega að koma okkur í erfiða hluti og við frjósum. Þetta er bara hræðilegt í alla staði.“

Grindvíkingar voru með forystuna nánast allan leikinn í kvöld, komust mest fimmtán stigum yfir í fyrri hálfleik og voru tíu stigum yfir þegar tæpar fjórar mínútur voru eftir.

„Tvisvar förum við tólf eða fimmtán stig yfir og bara hættum einhvern veginn. Ég veit ekki hvað á að segja, dómar í restina sem féllu ekki með okkur en í grunninn þá hendum við þessu frá okkur.

Við bara hendum boltanum frá okkur trekk í trekk og erum ekki sterkari á svellinum en það. Tuttugu og tveir tapaðir boltar, þá vinnur þú ekki körfuboltaleiki.“

Dramatíkin undir lokin var mikil. Þegar fimm sekúndur voru eftir áttu Grindvíkingar innkast á vallarhelmingi Stjörnunnar. Valur Orri Valsson kastaði boltanum inn, Jeremy Pargo náði ekki að handsama boltann með Ægi Þór Steinarsson í andlitinu á sér og boltinn endaði fyrir utan hliðarlínu. Dómararnir dæmdu Stjörnunni boltann og fóru svo í skjáinn og staðfestu dóminn, en frá einu sjónarhorni virtist sem Ægir Þór hefði snert boltann.

„Þeir giska á það að þeir eigi boltann og þar af leiðandi er það ekki nógu augljóst að þeir geti snúið því. Það er eitt sjónarhorn sem sýnir það augljóslega að Ægir kemur við boltann. Ég sagði við aðstoðardómarann, þeir eru stundum eins og krakkar í nammibúð að hlaupa í þennan skjá.“

„Til dæmis eins og í fyrri hálfleik þegar Jese [Febres] fellir Daniel [Mortensen], það er augljós óíþróttamannsleg villa. Og þetta fíaskó þegar er bara karfa góð og hvað heldur þú að það séu margir hérna inni, 2000 manns? Það sjá það allir nema einhverjir tveir sem horfa eitthvað annað og allt í einu megum við challenga það,“ en Jóhann Þór vísar þarna í atvik þar sem Grindvíkingar gátu skorað á ákvörðun dómara eftir að leikurinn hafði verið látinn ganga í nokkrar sekúndur og DeAndre Kane fengið villu sem síðan var dregin til baka.

Jóhann Þór vildi þó ekki beina of mikilli athygli á dómarana.

„Ég er bara svo fúll út í okkur sjálfa, hvernig við hendum þessu frá okkur. Við erum bara með þetta og svo bara lykilmenn, þetta er alveg óþolandi. Ég veit ekki hvað ég get sagt.“

Hann segist ekki þekkja reglurnar nógu vel hvað varðar það þegar þjálfarar mega skora á ákvarðanir dómara og senda þá í skjáinn.

„Ég þekki ekki reglurnar, þeir hljóta að gera það fjandinn hafi það. Við máttum gera það og gerðum það en það hefði ekki þurft, hefði ekki átt að þurfa af því þetta var augljóst. Það sáu þetta allir í húsinu nema þeir, það er ekki að drepa okkur heldur við sjálfir sem köstum þessu frá okkur. Tuttugu og tveir tapaðir og þá vinnur þú ekki lið eins og Stjörnuna.“

Grindvíkingar eru núna með bakið upp við vegg og eru fallnir úr leik tapi þeir í þriðja leik liðanna á mánudaginn. 

„Við erum hér í tviemur hörkuleikjum og lendum öfugu megin við línuna. Þurfum bara að vinna einn leik og byrja á mánudag, taka þá í Garðabæ og koma þessu aftur í Smárann.“