Veður

Strekkingur og væta suð­vestan­lands en allt að 17 stig fyrir austan

Magnús Jochum Pálsson skrifar
Á Seyðisfirði er spáð ansi góðu veðri. Vonandi rætist sú spá fyrir Seyðfirðinga.
Á Seyðisfirði er spáð ansi góðu veðri. Vonandi rætist sú spá fyrir Seyðfirðinga. Vísir/Vilhelm

Útlit er fyrir sunnan og suðvestan stinningsgolu og dálitla vætu með köflum á sunnan- og vestanverðu landinu í dag. Hiti verður þar á bilinu fimm til tíu stig. Hins vegar verður bjartara austanlands og gæti hiti náð 17 stigum þegar best lætur.

Þetta kemur fram í hugleiðingum veðurfræðings um veðurspána í dag.

Á morgun bætir í úrkomu en það verður lengst af þurrt á Norðausturlandi. Síðan er gert ráð fyrir svipuðu veðri næstu daga, hlýjar suðlægar áttir og víða rigning eða súld af og til, en yfirleitt þurrt norðaustanlands.

Veðurhorfur á landinu næstu daga

Á mánudag: Suðlæg átt, 5-13 m/s, hvassast vestantil og rigning með köflum, en úrkomulítið norðaustanlands. Hiti 7 til 15 stig, hlýjast á Norðausturlandi.

Á þriðjudag: Sunnan 8-15 og dálítil rigning af og til, en bætir í úrkomu um kvöldið. Yfirleitt hægari og bjart með köflum eystra. Hiti breytist lítið.

Á miðvikudag: Sunnan og suðvestan 5-13 og rigning sunnan- og vestanlands, hiti 4 til 10 stig. Bjart með köflum norðaustantil og hiti 12 til 17 stig að deginum.

Á fimmtudag og föstudag: Gengur í ákveðna suðvestlæga átt með skúrum eða slydduéljum um landið vestanvert, en þurrt að kalla fyrir austan. Kólnar í veðri.

Á laugardag: Útlit fyrir vestlæga átt og víða dálitlar skúrir eða slydduél. Hiti 2 til 10 stig, mildast fyrir austan.




Fleiri fréttir

Sjá meira


×