Leiknir byrjar vel undir stjórn Gústa Gylfa og ÍR-ingar á toppinn

ÍR er komið með tveggja stiga forskot á toppnum eftir 2-1 sigur á Þrótti. Þetta var þriðji deildarsigur liðsins í röð en ÍR-ingar hafa enn ekki tapað í deildinni í sumar.

Óðinn Bjarkason skoraði sigurmark ÍR eftir að Jakob Gunnar Sigurðsson hafði jafnað metin. Arnór Sölvi Harðarson hafði komið ÍR í 1-0 í fyrstu mínútu leiksins.

Njarðvíkingar voru búnir að vinna tvo leiki í röð en urðu að sætta sig við 1-1 jafntefli við Fjölni á heimavelli. Arnleifur Hjörleifsson kom Njarðvík í 1-0 en Árni Steinn Sigursteinsson jafnaði metin.

HK er komið upp í þriðja sætinu eftir 4-1 sigur á Selfossi. Jóhann Þór Arnarsson skoraði tvö mörk en hin mörkin gerðu þeir Þorsteinn Aron Antonsson og Dagur Orri Garðarsson. Sesar Örn Harðarson skoraði mark Selfyssinga.

Leiknir vann 2-1 útisigur á Fylki í fyrsta leiknum undir stjórn Ágústs Gylfason en liðið var búið að tapa fjórum leikjum í röð. Dagur Ingi Hammer Gunnarsson og varamaðurinn Þorsteinn Emil Jónsson komu Leikni í 2-0 en Þóroddur Víkingsson minnkaði muninn.

Völsungar unnu síðan 3-1 útisigur á Þór Akureyri í uppgjöri norðanliðanna tveggja. Þórsarar komust yfir en Húsvíkingar svöruðu með þremur mörkum. Hermann Helgi Rúnarsson skoraði fyrsta mark leiksins á 17. mínútu en þeir Rafnar Máni Gunnarsson, Arnar Pálmi Kristjánsson og Jakob Héðinn Róbertsson tryggðu Völsungum flottan sigur.