Besti ungi leik­maðurinn í Bónus deildinni semur við Álfta­nes

Hilmir er mjög efnilegur leikmaður en hann var útnefndur besti ungi leikmaður deildarinnar fyrir frammistöðu sína með Haukum á nýloknu tímabili.

Hilmir var með 7,5 stig meðaltali í leik en hann var með 35% þriggja stiga nýtingu og leiddi deildina í vítinganýtingu með 95,7%. Hilmir þykir frábær liðsmaður sem les leikinn vel. Hann er auk þess virkilega öflug skytta og duglegur varnarmaður.

Hilmir náði miklu flugi eftir því sem leið á tímabilið og skoraði rúm tíu stig í leik eftir áramót. Hann er 194 sentímetrar á hæð og leikur oftast í stöðu bakvarðar.

Hilmir hefur leikið á fjórða tug leikja fyrir yngri landslið Íslands og verið í lykilhlutverki. Hann er hluti af mögnuðu u18 ára landsliði sem tryggði sér sæti í A-deild Evrópukeppninnar. Þar leika bestu lið álfunnar. Hilmir og félagar héldu sér í A-deildinni síðasta sumar með vaskri framgöngu.

Að lokum má benda á að Hilmir hefur verið einstaklega sigursæll á sínum yngri flokka ferli. Hann hefur það meðal annars á afrekaskrá sinni að hafa orðið Íslandsmeistari í öllum flokkum sem keppt er í, frá 10 ára flokki og upp í hinn svokallaða ungmennaflokk. Hann á bara eftir að verða Íslandsmeistari í meistaraflokki.