Átta­tíu milljóna gjald­þrot Heima­bakarís á Húsa­vík

Greint er frá gjaldþrotinu í Lögbirtingarblaðinu í dag en þar segir að með úrskurði héraðsdóms Norðurlands eystra uppkveðnum 20. febrúar 2025 hafi búið verið tekið til gjaldþrotaskipta.

Skiptum hafi verið lokið 14. maí síðastliðinn án þess að greiðsla fengist upp í lýstar kröfur, auk áfallinna vaxta og kostnaðar eftir úrskurðardag gjaldþrotaskipta.

Greint var frá því í júní í október síðastliðnum að Heimabakarí, eina bakaríi bæjarisn, hefði verið skellt fyrirvaralaust í lás. Íbúar á Húsavík sögðu að tíðindin hefðu komið Húsvíkingum i opna skjöldu.

„Því miður hefur Heimabakarí lokað vegna rekstrarörðugleika. Þökkum viðskiptin á liðnum árum,“ stóð á blaði í glugga bakarísins þegar viðskiptavinir komu þar að luktum dyrum í október.

Bakarí hefur staðið við Garðarsbraut á Húsavík frá árinu 1923. Reksturinn hefur þó verið undir mismunandi nöfnum og undir stjórn nokkurra eigenda í gegnum tíðina. Frá árinu 2015 hét bakaríið Heimabakarí, en sögu þess virðist nú lokið.