Mjög mikil­vægt að eiga besta vin í vinnunni

„Þetta hugarfar dugar þó skammt því sem vinnuveitandi þarftu samt að díla við afleiðingarnar; Því fólk sem ekki á besta vin í vinnunni segist oftar einmanna , það er óánægðara með samvinnu og samskipti í vinnunni og það er óánægðari í starfi . Allt eru þetta atriði sem hafa áhrif á vinnustaðinn,“ segir Tómas.

„Þetta þýðir þó ekki að fólk þurfi að eiga sinn allra besta vin í heimi í vinnunni. Heldur frekar vin í vinnunni sem ber einkenni þess að vera besti vinur,“ segir Auðunn Gunnar Eiríksson stjórnenda- og vinnustaðaráðgjafi og útskýrir fyrir okkur:

Að eiga besta vin í vinnunni þýðir að það er einhver í vinnunni sem þú treystir, getur leitað aðstoðar hjá, getur rætt við um þín mál hvort sem þau snerta vinnuna eða einkalífið. 

Þetta snýst í raun um að þú upplifir þessa manneskju í vinnunni á svipaðan hátt og við gerum gagnvart okkar bestu vinum. Þótt þetta sé kannski vinur í vinnunni, sem við erum ekkert endilega í samneyti við utan vinnu.“

Síðasta sunnudag var alþjóðlegur dagur bestu vina og af því tilefni stendur Gallup fyrir morgunfundi klukkan 09 í dag, þar sem nýjar niðurstöður eru kynntar fyrir vinnumarkaðinn; Þar á meðal mikilvægi þess að fólk eigi sinn besta vin í vinnunni.

En hvers vegna ætli það sé?

Dæmi #1: Sláandi tölur um einmanaleika

Sú þróun virðist eiga sér stað um allan heim, að einmanaleiki er að aukast mjög hratt. Svo hratt reyndar að almennt er talað um einmanaleikafaraldur. Sem er slæmt því rannsóknir sýna að það að vera einmana skerðir lífsgæði meira en til dæmis að reykja 15 sígarettur á dag.

Ísland er ekki undanskilið þessu.

Því samkvæmt niðurstöðum Gallup segist 20% fólks á aldrinum 25-64 ára vera einmanna.

Þetta hlutfall er 15% meðal starfandi fólks á aldrinum 25-64 ára.

Og það sem verra er; Þetta er tilfinning sem fólk er að upplifa meira og minna allan daginn. Því að sögn Tómasar var spurningin í könnuninni svohljóðandi:

Hugsaðu um daginn í gær, upplifðir þú eftirfarandi tilfinningar MEIRIHLUTA DAGSINS í gær? Einmanaleika

Það sem þetta þýðir erað víða á vinnustöðum er fólk sem er að upplifa einmanaleika. Sem þó getur verið erfitt að tjá sig um.

En hvernig getur besti vinur í vinnunni hjálpað?

„Það sem rannsóknirnar okkar sýna er að það eru mun meiri líkur á að fólk upplifi einmanaleika ef það á ekki sinn besta vin í vinnunni,“ svarar Auðunn.

En er ekki nóg að eiga bara góðan vin í vinnunni, þarf þetta að vera besti vinur?

„Það er mikill munur á því hvernig fólki líður miðað við hvort það upplifir sig eiga góðan vin í vinnunni í samanburði við besta vin í vinnunni. Þú getur til dæmis upplifað þig eiga nokkra góða vini í vinnunni en það er ekki það sama og að eiga besta vin í vinnunni; sem þú berð fullt traust til og finnst þú geta rætt við um allt og alltaf leitað til. Eins og gengur og gerist hjá bestu vinum,“ svarar Auðunn.

Dæmi #2: Starfsánægja eða starfslok?

Keppikefli flestra vinnustaða er að byggja upp starfsánægju og þá helst þannig að starfsmannavelta sé sem minnst.

Að eiga besta vin í vinnunni hefur áhrif á þetta.

„Niðurstöður rannsóknanna okkar sýna að það eru meiri líkur á því að starfsfólk sé að leita að öðru starfi eða líklegt til að hætta á vinnustað ef fólk á ekki besta vin í vinnunni,“ segir Rannveig Gústafsdóttir, stjórnenda- og vinnustaðaráðgjafi.

En er aldursmunur á þessu? Telja eldri kynslóðir til dæmis mikilvægt að eiga besta vin í vinnunni?

„Það eru helst karlar á mínum aldri sem kvarta undan þessari spurningu og finnst hún hálfgerð vitleysa,“ svarar Tómas en bendir á að einmanaleiki sé að mælast mest hjá unga fólkinu, sem í raun getur átt svolítið erfitt uppdráttar hvað vinskap varðar.

„Vinskapur byggir á trausti og það tekur tíma að byggja upp traust. Ungt fólk er hins vegar oft að þreifa fyrir sér á vinnumarkaði og prófa sig áfram og jafnvel að vinna á vinnustöðum þar sem starfsmannavelta er mikil. Á meðan fólk er ungt að þreifa fyrir sér á vinnumarkaði getur verið erfitt að mynda sterk tengsl á vinnustað,“ segir Tómas.

„Ungt fólk er líklegra til að skipta oftar um starf. Þetta hefur líka áhrif á hvernig gengur að mynda tengsl innan vinnustaða,“ segir Rannveig.

Dæmi #3: Framúrskarandi teymin

Tómas segir nokkurn kynjamun á niðurstöðum rannsókna um besta vininn í vinnunni.

„Almennt eiga konur fleiri bestu vini en karlar.“

Það sem skiptir samt svo miklu máli varðandi það að fólk eigi besta vin í vinnunni er árangurinn og hvernig starfsfólk upplifir teymin sín.

„Tvöfalt fleiri upplifa teymið framúrskarandi ef fólk á besta vin í vinnunni, í samanburði við fólk sem á ekki besta vin í vinnunni. Fyrir vinnustaði sem vilja byggja upp framúrskarandi teymi skiptir því máli að huga að tengslum starfsfólks,“ segir Auðunn og bætir við:

„Rannsóknir sýna líka að það eru 33% minni líkur á einkenni kulnunar ef þú átt besta vin í vinnunni.“

Dæmi 4: Góðu ráðin

Á morgunfundinum í dag verða ýmiss mál rædd og nýjar niðurstöður kynntar sem tengjast fleiri málum en aðeins besta vininum.

Til dæmis um fjarvinnu og almenna heilsu starfsfólks.

„Það sem er að sýna sig svolítið í rannsóknum er að fólk tekur ákvarðanir meira út frá tilfinningum en rökhugsun. Þetta er hin svokallaða tilfinningahyggja sem fræðimenn hafa verið að horfa meira til undanfarin ár og það sama á við um okkur hjá Gallup. Í kauphegðun hafa rannsóknir til dæmis sýnt að 70% ákvörðunarinnar byggir á tilfinningu en 30% af rökhugsun, það er líka hægt að tengja þetta við starfsfólk en hvernig þeim líður hefur áhrif á það hvernig þau vinna starfið sitt“ nefnir Rannveig sem dæmi um áhugaverða vinkla fyrir fyrirtæki að hugsa um.

Að vinnustaðir fari að huga að því að stuðla að tengslum starfsfólks, segir Auðunn ekkert endilega þurfa að vera svo óeðlilega þróun þegar stóra myndin er skoðuð.

„Þessi einmanaleikafaraldur á sér að hluta til líka eðlilegar skýringar í breyttu samfélagi. Það var til dæmis algengara fyrir tuttugu árum eða meira að fólk var að taka þátt í alls kyns félagsstarfi í nærumhverfinu; Allt frá því að vera í Kiwanis, í íþróttahreyfingu, í kirkjustarfi og svo framvegis. Þessi félagsvirkni hefur minnkað í samfélaginu og til viðbótar er samfélagið líka að breytast í fjölþjóðlegt samfélag þar sem 20% vinnuafls á Íslandi kemur erlendis frá og hafa ekki þessi gömlu tengsl inn í til dæmis svona félagsstarf,“ segir Auðunn.

„Það eru svo sem ekki mælingar til um hvort fólk erlendis frá er að upplifa meiri einmanaleika en aðrir en sá hópur sem mælist mest einmana er ungt fólk. Það sýna líka rannsóknir Embættis Landlæknis sem er að fylgjast með þessu,“ segir Guðrún Hrönn Hilmarsdóttir stjórnenda- og vinnustaðaráðgjafi.

En hvað geta vinnustaðir gert til að stuðla að því að fólk eignist besta vin í vinnunni?

„Það er ýmislegt sem vinnuveitendur geta gert,“ segir Guðrún og nefnir nokkur góð ráð.

Ekki aðeins að standa að hópefli eða einhverjum skemmtilegum samverustundum heldur líka að veita möguleika á því að fólk geti myndað svona tengsl. 

Að þessu er hægt að huga með margvíslegum hætti; Til dæmis að tryggja að vinnurýmin bjóði upp á það, þannig að fólk geti farið afsíðis til að ræða saman. 

Að yfirmenn séu ekki svo mikið á klukkunni að þeir pirrist yfir því ef þeir sjá starfsfólk vera að spjalla saman í fimm mínútur.“

Enn eitt atriðið nefna Guðrún og Auðunn síðan bæði:

„Að vinnustaðir séu duglegir að halda upp á starfsamæli saman, gleðjast yfir því sem vel gengur og svo framvegis. Það þarf eiginlega að grípa öll tækifæri sem gefast til að fagna.“

Guðrún segir hrós líka skipta miklu máli.

„Þegar sá hópur er skoðaður sem hefur hætt á einhverjum vinnustað segjast 72% þeirra sem hættu störfum að þeir hafi ekki fengið endurgjöf eða hrós á vinnustaðnum. Þeir sem fá hrós og endurgjöf reglulega eru hins vegar mun ólíklegri til að hætta.“