Borga fimm milljarða fyrir táning

Nýjasti liðsmaður Brighton er sóknarmaðurinn Charalampos Kostoulas sem kemur frá Olympiacos og skrifaði undir samning til fimm ára. Hann er langdýrasti leikmaður sem seldur er frá grísku félagi en metið átti Daniel Podence sem seldur var frá Olympiacos til Wolves árið 2020 fyrir næstum helmingi lægri upphæð.

Kostoulas var í liði Olympiacos sem vann Meistaradeild ungmenna í fyrra, þar sem liðið vann Inter og Bayern München áður en það hafði betur gegn AC Milan í úrslitaleiknum.

Hann skoraði svo sjö mörk í 22 leikjum fyrir aðallið Olympiacos á nýafstaðinni leiktíð.

Áður hafði Brighton keypt hinn 19 ára gamla Stefanos Tzimas frá Nürnberg í vetur.

Upp­göt­vaður af um­boðs­manni Antet­okounmpo

BBC bendir á það að umboðsmaður Kostoulas sé fyrrverandi körfuboltaþjálfarinn Giorgos Panou sem er þekktastur fyrir að hafa tekið sjálfan Giannis Antetokounmpo að sér þegar hann spilaði körfubolta í næstefstu deild Grikklands árið 2013.

Panou sá Kostoulas spila þegar hann var 15 ára og segist strax hafa fengið sömu tilfinningu og varðandi Giannis, að þarna væri eitilhart hæfileikabúnt sem hefði mikla möguleika á að ná mjög langt.