Systurfélagi Silkeborg hent út úr Evrópu­keppninni áður en hún byrjar

Drogheda FC hefur verið hent út úr Evrópukeppninni vegna þess að félagið er með sömu eigendur og danska félagið Silkeborg IF.

Breska ríkisútvarpið segir frá örlögum írska liðsins.

Bæði félögin eru í eigu Trivela Group en samkvæmt reglum mega tvö félög í eigu sömu aðila ekki keppa í sömu keppni.

Alþjóða Íþróttadómstóllinn CAS hefur tekið mál Íranna fyrir og þeir mega ekki vera með í Sambandsdeildinni.

Írarnir höfðu áfrýjað úrskurði UEFA til CAS en urðu að sætta sig við sömu niðurstöðu.

Ástæðan fyrir því að danska félagið fær að vera með en ekki það írska er að það félag fær þátttökuréttinn sem endar ofar í deildarkeppninni heima fyrir.

Drogheda FC endaði í 9. sæti í írsku deildinni en Silkeborg í 7. sæti í dönsku deildinni. Írska félagið vann sér þátttökurétt sinn í Sambandsdeildinni með því að vinna bikarinn en það danska með því að vinna umspil sem liðið komst í með því að vinna úrslitakeppni neðri hlutans.

Derry City, sem Drogheda vann í bikarúrslitaleiknum, hefði átta að taka sætið í staðinn en fær það ekki því fresturinn hjá UEFA til að skrá sig til leiks er runninn út. Írarnir missa því eitt Evrópusæti.