Björguðu stjórn­vana bát í Faxa­flóa

Landsbjörg greinir frá því í fréttatilkynningu að aðstoðarbeiðni hafi í morgun borist frá litlum fiskibát þegar upp hafi komið bilun í stýrisbúnaði bátsins. 

Áhöfn björgunarbátsins Fiskakletts í Hafnarfirði hafi í kjölfarið kölluð út rétt upp úr átta í morgun. Fiskaklettur hafi verið komin að bátnum, sem þá var staddur rétt norður af Syðra Hrauni í Faxaflóa, um hálf tíu í morgun og áhöfnin komið taug á milli báta og stefnan svo sett inn til Hafnarfjarðar.  

Þangað kom Fiskaklettur með fiskibátinn í hádeginu, þar sem hægt var að landa þeim afla sem um borð var.

Þá er greint frá öðru útkalli í tilkynnningu Landsbjargar frá því í gær. 

Í gær, þjóðhátíðardag Íslendinga, hafi borist aðstoðarbeiðni frá hópi göngufólks þegar einn úr hópnum slasaðist í fæti í fjallshlíð ofan við bæinn Grímkelsstaði, suður af Þingvallavatni í Grafningnum, á svokallaðri Kattartjarnarleið.

Björgunarsveitir frá Hveragerði, Selfossi og úr Árnesi fóru á vettvang með utanvega hjól, mannskap og búnað til að flytja sjúkling. Komið var að hópnum og þeim slasaða rétt undir hádegið og honum komið fyrir í sjúkrabörum og hann búinn undir flutning, segir í tilkynningunni.  Sérútbúnar sjúkrabörur með hjóli hafi einnig notaðar og flutningur hafi gengið vel að sjúkrabíl sem beið neðan hlíðarinnar.