Sæta lög­reglu­rannsókn vegna níðsöngva um ís­raelska herinn

Ríkisstjórn Bretlands hefur fordæmt ummælin sem látin voru falla, og hefur BBC sætt harðri gagnrýni fyrir að leyfa atvikinu að eiga sér stað í beinni útsendingu.

Lisa Nandy, menningarmálaráðherra Bretlands, hefur krafið forstjóra BBC útskýringar á því hvers vegna sjónvarpsstöðin sjónvarpaði tónleikunum án athugasemda.

Talsmaður BBC hefur látið hafa eftir sér að ummælin hafi verið afar óviðeigandi, og sagði að á skjánum hefði verið gefin út viðvörun vegna tungutaksins. Þá verði tónleikarnir ekki aðgengilegir á spilara BBC eins og venjan er með flestar útsendingar.

BBC hefur ekki svarað fyrirspurnum um það hvort gerðar hafi verið fyrirfram ráðstafanir vegna mögulegrar hegðunar Bob Vylan, eða hvort gefin verði út afsökunarbeiðni til gyðinga.

„Death, death to the IDF, death death to the IDF,“ sagði söngvari rapptvíeykisins Bob Vylan aftur og aftur á sviði og áhorfendur tóku undir.

Auk þess fór rapparinn ófögrum orðum um gyðing sem er eigandi plötufyrirtækis sem Bob Vylan var einu sinni á mála hjá.

„Núna um daginn var birtur listi opinberlega yfir fólkið sem hafði reynt að koma í veg fyrir að vinir okkar í Kneecap fengju að spila hér í dag. Viti menn, hvern sé ég á helvítis listanum, þetta sköllótta ógeð sem ég vann einu sinni hjá,“ sagði söngvarinn á sviði.

Útsending BBC frá tónleikum Bob Vylan var send út án þess nokkuð hefði verið klippt út.

Seinna um kvöldið slökkti BBC á útsendingu frá tónleikum hljómsveitarinnar Kneecap, og sagði að klippt útgáfa af tónleikunum yrði gerð aðgengileg á vef BBC síðar.

Írska hljómsveitin Kneecap steig á svið skömmu seinna og þar sögðu þeir meðal annars:

„Til andskotans með Keir Starmer,“ til viðbótar við hefðbundin palestínsk slagorð.

Liam Óg Ó hAnnaidh, meðlimur Kneecap, sætir ákæru fyrir að hafa veifað fána hryðjuverkasamtakanna Hezbollah á öðrum tónleikum.

Tónleikum Kneecap var sem fyrr segir ekki sjónvarpað hjá BBC vegna þess að líklegt þótti að hljómsveitin myndi halda uppteknum hætti og hvetja til ofbeldis.

Írska hljómsveitin sætti harðri gagnrýni í apríl þegar upptaka frá tónleikum leit dagsins ljós, þar sem þeir sögðu: „Eini góði íhaldsmaðurinn er dauður íhaldsmaður. Drepið þingmann íhaldsflokksins á ykkar svæði,“ en hljómsveitin baðst síðar afsökunar á þessum ummælum.

Keir Starmer forsætisráðherra Bretlands og Kemi Badenoch formaður breska íhaldsflokksins, höfðu bæði lýst yfir óánægju með að Kneecap kæmi fram á hátíðinni.

Starmer sagði að það væri óviðeigandi að hljómsveitin fengi að spila.

„Þetta snýst um hótanir sem eiga ekki að viðgangast. Ég vil ekki segja of mikið af því það er dómsmál í gangi en ég held það sé ekki viðeigandi að hún spili á hátíðinni.“

Glastonbury hátíðin hefur gefið út yfirlýsingu þar sem framganga Kneecap og Bob Vylan er fordæmd.

„Glastonbury fordæmir alla hatursorðræðu og hvatningu til ofbeldis,“ segir í yfirlýsingu þeirra.

Ísraelska sendiráðið í Bretlandi birti færslu á X þar sem þau lýstu yfir mikilli óánægju með þá hvatningu til ofbeldis og hatursorðræðu sem þau segja að hafi fengið að viðgangast á hátíðinni.