Vann glæsilegan vinning í sumarbókaleik Bylgjunnar og Vísis

Félag íslenskra bókaútgefenda 3. júlí 2025 10:44

Sahara Rós hreppti stóra vinninginn í sumarleik Bylgjunnar og Vísis sem er gisting fyrir tvo í eina nótt með morgunverði og þriggja rétta kvöldverði á Íslandshóteli að eigin vali. Auðvitað býður hún eiginmanninum.

Sumarbókaleikur Bylgjunnar fór fram dagana 23.-27. júní á Bylgjunni og Vísi. Félag íslenskra bókaútgefenda gaf fimmtán lestrarhestum veglega bókapakka auk þess sem einn þeirra fékk gistingu fyrir tvo í eina nótt með morgunverði og þriggja rétta kvöldverði á Íslandshóteli að eigin vali.

Það var Sahara Rós sem hreppti stóra vinninginn og var hún eðlilega mjög ánægð. „Þetta var óvænt og kærkomin ánægja fyrir bókahöfund og ritstjóra eins og mig sem er búin að vera í fæðingarorlofi síðustu níu mánuði! Ég ætla að bjóða yndislega eiginmanni mínum með mér á hótelið og að sjálfsögðu tek ég líka bók með mér. Síðan ætla ég að njóta þess að lesa fyrir börnin mín barnabækurnar sem fylgdu með í vinningnum.“

Þátttakan í leiknum var mjög góð að sögn Bryndísar Loftsdóttur, framkvæmdastjóra Félags íslenskra bókaútgefenda. Þátttakendur áttu að setja mynd af bókinni sem þeir voru að lesa, mynd af bók sem þá langaði að lesa eða bók sem þeir mæltu með, á Facebook síðu Bylgjunnar.

Bryndís Loftsdóttir er framkvæmdastjóri Félags íslenskra bókaútgefenda.

Alls voru nefndir 245 bækur og var tekinn saman listi yfir þá 32 titla sem oftast voru nefndir. „Tvær nýjar skáldsögur deila fyrsta sætinu, Dúkkuverksmiðjan eftir Júlíu Margréti Einarsdóttur og Hefnd Diddu Morthens eftir Sigríði Pétursdóttur,“ segir Bryndís.

Tvær nýjar skáldsögur deildu fyrsta sætinu, Dúkkuverksmiðjan eftir Júlíu Margréti Einarsdóttur og Hefnd Diddu Morthens eftir Sigríði Pétursdóttur.

Sá höfundur sem samanlagt var oftast nefndur af hlustendum Bylgjunnar var Texas stjarnan Colleen Hoover fyrir bækur sínar Aldrei aldrei, Hjartabein, 9. nóvember og Þessu lýkur hér. „Á hæla hennar komu tvær erlendar skáldkonur. Annars vegar írska skáldkonan Lucinda Riley með risavaxna bókaflokkinn um Systurnar sjö, Fiðrildaherbergið, Miðnæturrósina, Morðin á heimavistinni og nýjasta verkið, Fiðrildaherbergið. Hins vegar sænska skáldkonan Moa Herngren með Tengdamömmuna og Skilnaðinn.“

Hún segir það hafa komið þeim hjá Félagi íslenskra bókaútgefenda á óvart hversu fjölbreyttur listinn var. „Glæpasögur hafa verið ríkjandi í efstu sætum metsölulista í aðdraganda jóla en þær virðast ekki jafn ráðandi nú á miðju sumri þegar reikna má með að lesendur séu að velja bækur fyrir sjálfan sig frekar en til gjafa. Okkur reiknast til að um 150 nýjar bækur séu komnar út á árinu, flestar þeirra má skoða á Bókatíðindavefnumog svo auðvitað í prentaðri útgáfu Bókatíðinda sem dreift verður um miðjan nóvember.“

Að lokum vill Bryndís minna á að opið er fyrir umsóknir um dómnefndarstörf Íslensku bókmenntaverðlaunanna og glæpasagnaverðlaunanna Blóðdropans. „Svo vonum við að allir landsmenn finni næði til þess að lesa eina bók í sumar!“

32 bókatitlar sem oftast voru nefndir:

1.-2. Dúkkuverksmiðjan - Júlía Margrét Einarsdóttir

1.-2. Hefnd Diddu Morthens - Sigríður Pétursdóttir

3.-7. Aldrei aldrei - Colleen Hoover, þýð. Birgitta Hassell og Marta Magnadóttir

3.-7. Diplómati deyr - Eliza Reid, þýð. Magnea J. Matthíasdóttir

3.-7. Fiðrildaherbergið - Lucinda Riley, þýð. Valgerður Bjarnadóttir

3.-7. Morð og messufall - Arndís Þórarinsdóttir og Hulda Sigrún Bjarnadóttir

3.-7. Vinkonur að eilífu? - Sara Morgan, þýð. Birgitta Hassell og Marta Magnadóttir

8.-11. Bylur - Íris Ösp Ingjaldsdóttir

8.-11. Hildur - Satu Rämö, þýð. Erla Elíasdóttir Völudóttir

8.-11. Litla leynivíkin í Króatíu - Julie Caplin, þýð. Kristín Valgerður Gísladóttir

8.-11. Tengdamamman - Moa Herngren, þýð. Sigurður Þór Salvarsson