Ógeðs­leg að­koma að í­búðinni eftir Airbnb-gesti

„Mig langar að ræða vandamál sem varðar hegðun ferðamanna á Íslandi,“ segir leigusalinn í nafnlausri færslu á Facebook síðunni Iceland - Tips for travelers, en DV vakti athygli á málinu í gær.

„Sem aðili í ferðaþjónustunni verð ég oft var við virðingarleysi fólk fyrir stöðunum sem þau dvelja á, og gagnvart fólkinu sem sér um staðina. Það er leiðinlegt að sjá óhreint leirtau, matarleifar og annað rusl um alla íbúð ... gangið þið svona um ykkar eigin heimili?“ spyr hann.

„Því miður hef ég tekið eftir því að þessi atvik eru mun algengari hjá gestum frá Indlandi og Kína. Auðvitað eru ekki allir svona, margir ganga mjög vel um, en það er orðið erfitt að hunsa mynstrið.“

Þá biðlar hann til fólks að ganga um íbúðir sem maður gistir í eins og maður gengur um eigið heimili, og tiltekur níu atriði sem ferðamenn ættu að hafa í huga:

1. Safnið öllu rusli og setjið í poka
2. Setjið öll notuð handklæði á einn stað (til dæmis í baðkarið)
3. Reynið ekki að búa um rúmið
4. Þrífið alla óhreina diska eða setjið þá alla í vaskinn
5. Slökkvið öll ljós, hita, loftkælingu og á öllum raftækjum
6. Kíkið ofan í allar skúffur svo þið skiljið ekki eftir persónulega muni
7. Skiljið lykilinn eftir á tilætluðum stað
8. Látið vita ef eitthvað skemmdist
9. Yfirgefið staðinn á tilsettum tíma eða látið vita ef það gengur ekki