Með átta mörk og sex stoð­sendingar í sama leiknum

Patrekur Orri og félagar í Álafoss liðinu unnu þá 17-1 sigur á Reynir Hellissandi í A-riðli fimmtu deildar.

Það er ekki oft sem leikir í íslensku F-deildinni komast í fréttirnar en frammistaða Patreks Orra gaf svo sannarlega ástæðu til þess.

Knattspyrnufélagið Álafoss frá Mosfellsbæ segir frá afrekum leikmannsins síns á samfélagsmiðlum.

Patrekur Orri átti nefnilega þátt í fjórtán af sautján mörkum liðsins en leikurinn fór fram á Malbikstöðinni að Varmá.

Patrekur Orri skoraði átta mörk sjálfur en gaf líka sex stoðsendingar á félaga sína.

Staðan var orðin 2-0 þegar Patrekur Orri skoraði fyrsta markið sitt á 19. mínútu en sextán mínútum síðar var hann kominn með fernu.

Patrekur Orri skoraði síðan fimmta markið sitt á 71. mínútu, sjötta markið á 76. mínútu, sjöunda markið á 82. mínútu en áttunda og síðasta markið sitt skoraði hann síðan á 88. mínútu.

Alexander Aron Davorsson skoraði fernu fyrir Álafoss og Davíð Ívarsson var með þrennu.

Álafoss er efst í deildinni með níu sigra í ellefu leikjum og hefur skorað 50 mörk í þessum leikjum.

Patrekur Orri er ekki markahæstur í deildinni þrátt fyrir að vera kominn með þrettán mörk því liðsfélagi hans Alexander Aron er enn einu maarki á undan honum.