Sjáðu Peder­sen bæta metið og Skaga­menn jafna með skrýtnum mörkum

Valsmenn gátu náð fjögurra stiga forskoti á toppnum með sigri og lengi vel stefndi í það.

Patrick Pedersen kom Val í 2-0 með tveimur mörkum í fyrri hálfleik en hann sló markamet Tryggva Guðmundssonar með fyrra marki sínu sem kom eftir laglegan undirbúning Jónatans Inga Jónssonar. Hitt markið kom úr víti sem Jónatan Ingi fiskaði.

Skagamenn jöfnuðu i seinni hálfleiknum með tveimur skrýtnum mörkum.

Fyrra markið var sjálfsmark Valsmanna en Bjarni Mark Antonsson ætlaði að hreinsa á marklínunni en skaut boltanum í hausinn á sjálfum sér og í markið.

Slysalegt mark en jöfnunarmarkið var aftur á móti alveg stórfurðulegt.

Föst fyrirgjöf Jóns Gísla Gíslasonar frá hægri fór af öxlinni af Ómari Birni Stefánssyni við vítateigslínuna og sveif yfir Frederik Schram í marki Vals og datt niður í markið. Ótrúlegt mark.

Mörkin má sjá hér fyrir neðan.