Tóku hlé í miðju hlaupi til að halda tón­leika

Allir hlupu þeir til stuðnings minningarsjóðs Lofts Gunnarssonar sem lést 32 ára gamall úr magasári. Hann hafði verið heimilislaus um nokkra hríð áður en hann lést og hefur minningarsjóðurinn frá stofnun lagt áherslu á málefni jaðarsettra einstaklinga. Á vef Reykjavíkurmaraþons má sjá að alls hafa safnast fyrir sjóðinn 302 þúsund krónur. Hægt er að heita á hlaupa til miðnættis á morgun, mánudag.

Þau sem hlupu fyrir sjóðinn í gær voru Brandur Gunnarsson bróðir Lofts, Gunni Hilmarsson mágur Lofts og æskuvinir Lofts þeir Krummi Björgvinsson, Frosti Logason, Pétur Ben, Frosti Jón Runólfsson, Matthías Kristinsson, Björn Árnason og Albert Torfi Ólafsson.

Minningarsjóðurinn er í nánu samtali og samstarfi við velferðarsvið Reykjavíkurborgar, VOR-Teymið og ýmis úrræði fyrir heimilislausa svo sem gistiskýlin og konukot. Í tilkynningu um gjörninginn segir að sjóðurinn hafi frá stofnun keypt fjölda rúma, sjónvörp, húsgögn, fatnað og margt fleira inn í hin ýmsu úrræði sem eru til staðar, til dæmis smáhýsi fyrir heimilislausa í Gufunesi auk þess að styrkja Frú Ragnheiði um fjórar milljónir til kaups á nýjum bíl. Frá upphafi hefur sjóðurinn ráðstafað yfir tuttugu milljónum til bæta aðbúnaðinn við hópinn.

„Aðstæður jaðarsettra á Íslandi eru að mörgu leyti hörmulegar og eru brot á mannréttindum þeirra. Allir fæðast jafnir og við sem samfélag eigum að aðstoða þá sem eru í neyð. Það er auðvelt að líta fram hjá þessum hópi samfélagsins, afskrifa hann og gleyma honum. Þessi hópur nýtur lítillar virðingar og verður hann fyrir fordómum og skilningsleysi. Hann lætur aldrei í sér heyra, röltir þögull um bæinn og lætur lítið fyrir sér fara, biður ekki um neitt og á sér engan málsvara sem getur þrýst á kerfið,“ segir Gunni.

Hann segir sorglegt að Loftur hafi látist úr magasári sem hefði verið auðvelt að meðhöndla.

„Á þeim tíma sem hann lést var ekki auðvelt fyrir jaðarsetta einstaklinga að verða sér úti um fordómalausa læknisaðstoð,“ segir Gunni.

Það fjármagn sem safnast í ár mun sjóðurinn ráðstafa til aðstoðar Konukoti, neyðarskýli fyrir heimilislausar konur, en Konukot flytur úr Hlíðunum í Ármúla í haust.