Körfubolti

Besta sætið: „Þetta er Martin sem við þekkjum“

Ingvi Þór Sæmundsson skrifar
Martin Hermannsson skoraði samtals 26 stig í fyrstu þremur leikjum Íslands á EM en 22 stig í leiknum gegn Slóveníu í gær.
Martin Hermannsson skoraði samtals 26 stig í fyrstu þremur leikjum Íslands á EM en 22 stig í leiknum gegn Slóveníu í gær. vísir/hulda margrét

Benedikt Guðmundsson gladdist mjög yfir góðri frammistöðu Martins Hermannssonar í leik Íslands og Slóveníu á EM í körfubolta.

Eftir þrjá erfiða leiki spilaði Martin einkar vel þegar Íslendingar lutu í lægra haldi fyrir Slóvenum, 79-87, í fjórða leik sínum í D-riðli á Evrópumótinu í gær. Martin skoraði 22 stig, tók fjögur fráköst og gaf sex stoðsendingar. Hann var næststigahæstur á vellinum á eftir ofurstjörnunni Luka Doncic.

„Þetta er Martin sem við þekkjum,“ sagði Benedikt í Besta sætinu, hlaðvarpi íþróttadeildar Sýnar, þar sem leikurinn gegn Slóveníu var gerður upp.

Martin hefur verið lykilmaður í íslenska landsliðinu í mörg ár og Benedikt segir að stuðningsmenn þess séu orðnir góðu vanir þegar kemur að framlagi frá bakverðinum knáa.

„Maður var orðinn svo ofdekraður af frammistöðum frá Martin að maður var eiginlega orðinn hissa þegar hann átti ekki toppleik, heldur bara fínan leik. Maður var farinn að taka því allt of mikið sem sjálfsögðum hlut,“ sagði Benedikt.

„En þetta er frammistaðan sem maður var að vonast eftir og hún kom heldur betur í dag [í gær], bæði þegar kom að því að skora og spila menn uppi.“

Martin hitti úr sjö af níu skotum sínum inni í teig gegn Slóveníu og tvö af fjórum þriggja stiga skotum hans rötuðu rétta leið. Þá nýtti hann bæði vítaskotin sín.

Fimmti og síðasti leikur Íslands á EM er gegn Frakklandi, silfurliði síðustu Ólympíuleika, á morgun. Íslendingar og Frakkar mættust á EM fyrir átta árum. Þar hafði franska liðið betur, 115-79. Martin skoraði þrettán stig í leiknum og var næststigahæstur í íslenska liðinu á eftir Jóni Arnóri Stefánssyni.

Hægt er að hlusta á Besta sætið í heild á tal.is eða í öðrum hlaðvarpsveitum, eða í spilaranum hér ofar í greininni.


Tengdar fréttir

Skýrsla Vals: Erfitt að vera litla liðið

Leik lokið. 87-79 fyrir Slóveníu niðurstaðan. Líkt og í byrjun leiks eru það stuðningsmenn Íslands sem standa og kalla á lið sitt á meðan minna fer fyrir öðrum. Dagurinn hófst á gæsahúð og endar á henni sömuleiðis.

„Auðvitað er ég svekktur“

„Fannst við aftur eiga góðan leik. Við fengum tækifæri í síðari hálfleik sem við nýttum ekki nægilega vel. Gegn góðu liði eins og Slóveníu þarf maður að nýta slík tækifæri til að halda sér inn í leiknum og gefa sér möguleika á að fara með sigur af hólmi.“

„Verðum að þekkja okkar gildi“

„Væntingastjórnunin var sú að sækja sigur. Við sáum tækifæri til að vinna þennan leik,“ sagði Ægir Þór Steinarsson eftir tap Íslands gegn Slóveníu á Evrópumóti karla í körfubolta. Ægir Þór var að leika sinn 100. A-landsleik.

„Var loksins ég sjálfur“

Martin Hermannsson átti sinn besta leik á Evrópumótinu í körfubolta þegar Ísland tapaði fyrir Slóveníu, 79-87, í dag. Martin var svekktur í leikslok en segir að íslenska liðið sýni leik eftir leik að það eigi heima á stærsta sviðinu.

„Enginn í heiminum að gera þetta nema hann“

„Stoltur af okkur, það eru bara pínulitir hlutir sem vantar upp á“ sagði Jón Axel Guðmundsson eftir 79-87 tap Íslands gegn Slóveníu á EM í körfubolta. Hann fékk það erfiða verkefni að dekka Luka Doncic í leiknum.




Fleiri fréttir

Sjá meira


×