Flug­vellinum í Ála­borg lokað vegna drónaflugs

Í umfjöllun danska ríkisútvarpsins segir að flugvellinum hafi verið lokað vegna þessa og að í hið minnsta fjórum flugvélum hafi verið stefnt annað. Lögregla er á vettvangi og er búist við því að honum verði lokað þar til í fyrramálið.  

Lögreglan í Álaborg hélt blaðamannafund vegna málsins klukkan 22:00 að íslenskum tíma. Þá hélt danski ríkislögreglustjórinn blaðamannafund 22:30 að íslenskum tíma vegna drónaflugsins.

Dönsk yfirvöld hafa enn ekki tjáð sig um það hvern þau gruni um að bera ábyrgð. Volodómír Selenskí Úkraínuforseti hefur fullyrt að Rússar beri ábyrgð.

Vita ekki hvaðan drónarnir koma

Samkvæmt lögreglunni í Álaborg sást fleiri en einn dróni á sveimi yfir flugvellinum. Eigi lögregla möguleika á að skjóta þá niður þá verður það gert ef það er talið öruggt, að því er fram kom á blaðamannafundi. Fram kemur í umfjöllun TV2 að lögregla telji að nú þegar komið er á tíunda tímann á Íslandi séu enn drónar í lofti yfir flugvellinum.

Jesper Bøjgaard lögreglustjóri lögreglunnar á Norður-Jótlandi segir að farþegum á flugvellinum og íbúum í Álaborg stafi ekki hætta af drónunum. Markmiðið sé að finna þá sem beri ábyrgð. Lögreglan sé með mikinn viðbúnað á vellinum.

Hann vill ekki segja til um hve stórir drónarnir séu eða hvort að þeir sem fljúgi þeim séu í grennd við flugvöllinn. Lögregla viti ekki hvaðan þeir koma að svo stöddu. Ekki sé hægt að segja til um það á þessum tímapunkti hvort drónaflugið muni koma til með að hafa áhrif á flugferðir frá vellinum í fyrramálið. 

Gert Madsen danskur farþegi um borð í vél KLM frá Amsterdam til Álaborgar sem lent var í Billund segir við TV2 að þeim hafi verið sagt að loftrými flugvallarins í borginni verði líklega lokað þar til í fyrramálið. Madsen og aðrir farþegar munu taka rútu frá Billund til Álaborgar.

Svipar til þess sem gerðist fyrir tveimur dögum

Thorkild Fogde ríkislögreglustjóri Danmerkur boðaði til blaðamannafundar nú klukkan 22:30 að íslenskum tíma vegna málsins. Hann segir flug drónanna í Álaborg í kvöld líkt því sem hafi átt sér stað í Kaupmannahöfn, of snemmt sé hinsvegar að fullyrða að málin tengist. Það sé til rannsóknar.

Hann segir að lögregla muni róa að því öllum árum að skjóta drónana niður sé þess kostur, í samráði við danska herinn. Lykilatriði sé að komast að því hver beri ábyrgð. 

Þá segir Fodge að lögreglustjórar Danmerkur muni funda saman vegna málsins á fimmtudag. Lögregla sé með aukinn viðbúnað við flugvelli landsins. Misáreiðanlegum ábendingum um dróna rigni nú yfir lögregluembætti landsins. 

Telja ekki að drónarnir séu í einkaeigu

Lögregla segist ekki telja að drónarnir séu í einkaeigu. Auðvelt sé að rekja dróna sem seldir séu í verslunum.

Ekkert bendi til þess að drónarnir yfir Kastrup og drónarnir yfir flugvellinum í kvöld komi þaðan. Of snemmt sé að segja til um það hvort um sé að ræða sömu gerð af drónum í Álaborg og í Kaupmannahöfn.

Á sama tíma biðlaði lögreglustjórinn til almennings og þeirra sem eiga dróna um að fljúga ekki drónum í grennd við mikilvæg mannvirki á borð við flugvelli. Slíkt geti kostað þunga fangelsisrefsingu og/eða háar fjársektir.

Fréttin hefur verið uppfærð.