Raya að skrifa undir nýjan samning

Arsenal keypti Raya frá Brentford sumarið 2024 eftir að hann hafði leikið sem lánsmaður með liðinu tímabilið 2023-24. Samningur hans við Arsenal gildir til 2028 með möguleika á árs framlengingu. Spánverjinn fær hundrað þúsund pund í vikulaun en þau koma til með að hækka með nýja samningnum.

Hinn þrítugi Raya hefur leikið á Englandi allan sinn feril, fyrst með Blackburn Rovers frá 2014 til 2019 þegar hann fór til Brentford. Raya var lánaður til Southport tímabilið 2014-15.

Raya fékk Gullhanskann 2024 og 2025 en hann er veittur þeim markverði sem heldur oftast hreinu í ensku úrvalsdeildinni.

Raya hefur leikið alla sjö leiki Arsenal í ensku úrvalsdeildinni á þessu tímabili og haldið fjórum sinnum hreinu. Skytturnar eru með eins stigs forskot á toppi deildarinnar.