Flugnördar heims kveðja fegurstu flug­vél Ís­lands

Í fréttum Sýnar fórum við í kveðjuflug farþegaþotu. Það má alveg kalla þá flugnörda sem streymdu í hádeginu um borð í 757-þotuna Heklu Aurora. Kannski voru fáir samt spenntari en hinn fimm ára Hermann Steinn Hermannsson sem mætti í flugstjórabúningi og sýndi af sér mikla kæti.

-Hversvegna ertu svona glaður?

„Út af því að ég er að fara í Heklu Auroru. Hún er uppáhaldsflugvélin mín. Hún er svo stór,“ sagði fimm ára guttinn.

Icelandair lét mála hana í litum norðurljósanna fyrir áratug og fyrir það hefur hún hlotið frægð innan hins alþjóðlega flugheims.

„Það hefur verið gríðarlegur áhugi. Og við sjáum það hér. Hér eru Íslendingar en síðast en ekki síst erlendir aðilar sem koma sérstaklega til landsins til að fara þetta tiltekna flug,“ sagði Guðmundur Tómas Sigurðsson, flugrekstrarstjóri Icelandair.

Af um 140 farþegum voru um 70 útlendingar sem fóru sérstaka ferð til Íslands bara til að komast í þessa flugferð, meira að segja alla leið frá Singapore.

„Ég kom frá Inverness í Skotlandi og það tók mig um átta tíma að komast hingað bara til að sjá Heklu,“ sagði Julie Balford.

„Hún er undursamleg og er frábært tákn fyrir Ísland og er ein síðasta Boeing 757 í Evrópu,“ sagði sú skoska.

„Ég kom frá Lundúnum bara til að sjá þessa fegurðardís. Ég hef aldrei flogið með Icelandair fyrr. Ég hef fylgst með þessari vél,“ sagði Andy Zou.

„Þetta er ein frægasta sjöfimmtíuogsjöan í heiminum,“ sagði flugrekstrarstjórinn Guðmundur Tómas.

Og sá sem samdi við Icelandair um flugvélina árið 2004, Satoru Ohki frá Japan, var aftur mættur.

„Ég sá um að koma þessari flugvél til Íslands fyrir 21 ári,“ sagði hann.

Flugvallarslökkviliðið kvaddi Heklu með heiðursbunu þegar hún lagði upp í þetta sérstaka kveðjuflug sem Icelandair efndi til. Farið var í tvegga stunda útsýnisflug um landið undir stjórn Björns Magnúsar Sverrissonar flugstjóra og Guðrúnar Tómasdóttur flugmanns, sem tóku meðal annars lágflug yfir Eyjafjörð og Akureyri.

Þaðan var flogið yfir Bárðardal, Mývatnssveit og Jökulsá á Fjöllum. Austur á Héraði sáum við Dyrfjöllin og Egilsstaði og á hálendinu birtust Kverkfjöll og Dyngjujökull. Farþegarnir dáðust að útsýninu.

Yfirflugfreyjan Sigurlaug Halldórsdóttir sagði farþegum í hátalarakerfið að Hekla Aurora væri fallegasta flugvél í heimi. Og unga flugáhugamanninum Hermanni var boðið að fara frammí.

Í vetur verða aðeins fimm 757-þotur eftir í flota Icelandair. Horfur eru á að sú síðasta hverfi úr flota félagsins eftir tæpt ár.

Norðurljósavélin Hekla Aurora, sem er elsta flugvél Icelandair, er hins vegar komin á endastöð eftir 31 árs sögu sem farþegaflugvél en hún rann út úr Boeingverksmiðjunum í júlí 1994.

„Næst flýgur hún bara inn í sólarlagið í eyðimörkina í Bandaríkjunum og fer í niðurrif þar,“ sagði flugrekstrarstjóri Icelandair.