Tveir hand­teknir vegna Louvre ránsins

Mennirnir voru samkvæmt heimildum Le Parisien, báðir fæddir í Frakklandi og um þrítugt.  Þeir eru einnig sagðir vera góðkunningjar lögreglu og hafa áður verið bendlaðir við innbrot og þjófnað.

Sunnudaginn 19. október brutu fjórir bíræfnir ræningjar sér leið inn á Louvre-safnið og rændu þaðan dýrmætum kórónum og skartgripum frá tíma Napóleóns og franskra konunga og drottninga.

Þýfið sem ræningjarnir komust undan með er metið á rúmar hundrað milljónir dala, sem samsvarar um 12,6 milljörðum króna, samkvæmt frétt BBC.

Lögreglan getur haldið mönnunum í 96 klukkustundir áður en þeir þurfa að vera ákærðir eða þeim sleppt.

Ógnuðu vörðum með verkfærum

Ræningjarnir mættu fyrir utan safnið heimsfræga um klukkan 9:30 að morgni til, skömmu eftir að safnið opnaði, og notuðu stigabíl til að komast að tiltölulega óvörðum glugga á safninu.

Hann brutu þeir og hlupu inn með verkfæri sem þeir notuðu til að ógna óvopnuðum öryggisvörðum sem flúðu. Mennirnir notuðu verkfærin því næst til að opna sýningarbása og ræna munum.

Á innan við fjórum mínútum voru þeir komnir aftur út og flúðu á vespum sem biðu þeirra.

Fréttin hefur verið uppfærð.