Sarkozy laus úr fangelsi

Skömmu eftir að honum var sleppt úr La Santé-fangelsinu í París sást hann koma á heimili sitt í vesturhluta borgarinnar. Hinum sjötuga Sarkozy er óheimilt að yfirgefa franskt landsvæði og eiga í samskiptum við annað lykilfólk málsins á borð við vitni og meðákærða á meðan málið bíður frekari meðferðar. Gert er ráð fyrir að áfrýjunarmeðferð fari fram síðar og þá mögulega næsta vor. AP-fréttaveitan greinir frá þessu.

Eftir sakfellingu Sarkozy þann 25. september síðastliðinn varð hann fyrsti fyrrverandi nútímaþjóðhöfðingi Frakklands til að verða settur bak við lás og slá. Hann neitar sök en var fangelsaður þann 21. október á meðan hann beið áfrýjunar málsins. Hann sóttist strax eftir að verða sleppt fyrr úr haldi og féllst áfrýjunardómstóll á þá beiðni í dag.

Verið mjög erfið lífsreynsla

Við réttarhöldin í dag hélt Sarkozy því fram að hann hafi ekki farið á svig við lög þegar kom að fjármögnun kosningabaráttunnar og uppfyllt allar lagalegar kröfur.

„Ég hafði aldrei ímyndað mér að ég myndi upplifa fangelsi 70 ára gamall,“ sagði hann og bætti við að reynslan hafi verið mjög erfið.

Á sama tíma vottaði Sarkozy starfsfólki fangelsisins virðingu sína og sagði það hafa hjálpað honum í gegnum „þessa martröð.“ Eiginkona Sarkozy, ofurfyrirsætan og tónlistarkonan Carla Bruni-Sarkozy, og tveir synir hans voru viðstödd réttarhöldin í dómshúsinu í París.

Jafnframt sagði forsetinn fyrrverandi að hann hefði aldrei sóst eftir fjármunum frá Moammar Gaddafi, leiðtoga Líbíu. „Ég mun aldrei viðurkenna eitthvað sem ég gerði ekki.“

Frönsk lög kveða á um að almenna reglan sé sú að sakborningar fái lausn á meðan áfrýjun stendur, að sögn AP. Á sama tíma sé varðhaldi beitt ef sakborningar eru taldir hættulegir, líklegir til að flýja land, eða í þeim tilgangi að vernda sönnunargögn eða koma í veg fyrir að vitni verði beitt þrýstingi.

Áður dæmdur fyrir spillingu

Dómstólinn bannaði Sarkozy sérstaklega að vera í sambandi við franska dómsmálaráðherrann Gérald Darmanin. Þetta telst sjaldgjæft en Darmanin er sagður hafa litið á Sarkozy sem læriföður sinn áður en hann gekk aftur til liðs við miðjuflokk Emmanuel Macron, núverandi Frakklandsforseta, og varð dómsmálaráðherra. 

Darmanin heimsótti Sarkozy í fangelsið í síðasta mánuði og gagnrýndu sumir franskir dómarar þessa ákvörðun hans, að sögn AP-fréttaveitunnar.

Sarkozy var forseti Frakklands á árunum 2007 til 2012. Hann stendur frammi fyrir ólíkum dómsmálum, þar á meðal úrskurði hæstaréttar Frakklands frá 26. nóvember um ólöglega fjármögnun á misheppnuðu endurkjörsframboði hans árið 2012 og áframhaldandi rannsókn á meintum afskiptum af vitnisburði í Líbíumálinu.

Árið 2023 var hann fundinn sekur um spillingu fyrir að reyna að múta dómara í skiptum fyrir upplýsingar um dómsmál sem hann var tengdur. Hæstiréttur Frakklands staðfesti síðar dóminn.

Fréttin hefur verið uppfærð.