Ferðaþjónusturisar stefna á sam­einingu

Í fréttatilkynningu þess efnis segir að gert sé ráð fyrir að áreiðanleikakönnun og kaupsamningsgerð ljúki fyrir áramót. Félögin muni ekki veita frekari upplýsingar að svo stöddu.

Stefna á að styrkja stöðu landsins

„Með sameiningu þessara tveggja rótgrónu félaga verður til öflugt ferðaþjónustufyrirtæki með afar breitt þjónustuframboð. Sameinað félag verður leiðandi afl í fjárfestingum, uppbyggingu og þróun íslenskrar ferðaþjónustu um land allt og styrkir þannig samkeppnisstöðu greinarinnar gagnvart alþjóðlegum ferðaþjónusturisum,“ er haft eftir Ásgeiri Baldurs, forstjóra Arctic Adventures.

„Við horfum á þennan samruna sem sameiginlegt tækifæri til að byggja upp framtíð íslenskrar ferðaþjónustu með fólkið okkar í fararbroddi. Starfsfólk beggja fyrirtækja býr yfir dýrmætri reynslu og ástríðu fyrir að skapa einstaka upplifun fyrir gesti okkar. Með því að sameina krafta, þekkingu og metnað getum við nýtt tækni og nýsköpun til að efla sjálfbæra ferðaþjónustu, skapa fleiri tækifæri, og styrkja Ísland sem leiðandi áfangastað í alþjóðlegri samkeppni,“ er haft eftir Birni Ragnarssyni, forstjóra Icelandia.

Í tilkynningu segir að ráðgjafar Arctic Adventures í viðskiptunum séu Arma Advisory og Logos lögmannsþjónusta. Arctica Finance og BBA//Fjeldco séu ráðgjafar Icelandia.

Áratugareynsla hjá báðum

Loks segir að Arctic Adventures, sem hafi verið stofnað árið 1983, sé leiðandi fyrirtæki á sviði ævintýra- og afþreyingarferðaþjónustu á Íslandi. Fyrirtækið leggi áherslu á ábyrgt og öruggt aðgengi að áfangastöðum í íslenskri náttúru og bjóði ferðamönnum sjálfbæra og vistvæna ferðaþjónustu um allt land. Félagið reki vinsæla áfangastaði á borð við Fjaðrárgljúfur, Kerið, Into the Glacier, Raufarhólshelli og Hvalasafnið. Arctic Adventures reki að auki hótel og gististaði ásamt ferðabílaleigunni Happy Campers.

Kynnisferðir, sem starfi undir vörumerkinu Icelandia, er eitt rótgrónasta og fremsta ferðaþjónustufyrirtæki landsins. Fyrirtækið var stofnað árið 1968 og býður ferðamönnum upp á fjölbreytt úrval ferða og upplifana undir þekktum vörumerkjum á borð við Reykjavik Excursions, Flybus, Icelandic Mountain Guides, Dive.is og Activity Iceland. Icelandia sinnir einnig almenningssamgöngum og flutningum, og hefur á síðustu árum lagt aukna áherslu á sjálfbærni, gæði og stafræna þjónustu.