Óttast að Dimma hafi endað í gini tófunnar

Hjónin Jóhann Helgi Hlöðversson og Margrét Ormsdóttir tóku hrafninn Dimmu undir sinn verndarvæng eftir að hann slasaðist á íþróttasvæðinu á Selfossi árið 2020.

Síðan þá hefur Dimma meira og minna búið hjá þeim hjónum, fengið mat og þjálfun hjá Jóhanni og leikið við hundinn Rjúpu. Á sama tíma hefur Dimma orðið einn frægasti fugl landsins, tugir þúsunda horfa á myndbönd sem Jóhann birtir reglulega af hrafninum og hafa vinirnir líka komið fram í sjónvarpi. 

Jóhann greindi fyrst frá því í myndbandi í gær að ekki hefði sést til Dimmu í að verða þrjá daga. Það væri óvanalegt og biðlaði Jóhann til fólks á Heiðamerkursvæðinu að hafa augun opin. Í morgun birti hann svo annað myndband um möguleg afdrif Dimmu.

„Ég var að fá símtal frá Atla, vini mínum, sem býr ská á móti við Helluvatn líka. Hann sagðist hafa séð fyrir tveimur dögum mórauðan, stóran ref sem virðist búinn að drepa álft (vonandi ekki álftaparið okkar) úti á vatninu og var að éta innan úr henni á ísnum,“ sagði hann í því myndbandi.

Jóhann sagði þau hjónin ætla að leita af sér allan grun og bætti við:„Vonandi hefur hún ekki lent í klónum á Mikka.“

Heldur sig nærri og kemur þegar kallað er

„Ég er akkúrat að fara núna að leita betur,“ sagði Jóhann Helgi þegar blaðamaður hringdi til að spyrja út í afdrif Dimmu.

„Það er spurning hvort það sé greni þarna, við þurfum að fá meindýreyði til að tékka á þessu. Ég ætla að fara og athuga hvort ég finni eitthvað af henni Dimmu. En vonandi er hún lifandi,“ sagði hann.

Grunaði Jóhann þó sterklega að allt hefði farið á versta veg.

„Hún er búin að vera týnd í tvo daga, það gerist ekki, og hún svarar alltaf og kemur þegar ég kalla á hana,“ sagði Jóhann.

„Hún fer aldrei í meira en kannski fimmhundruð radíus frá húsinu og kemur svo bara þegar ég kalla.

Hrafnapar farið að færa sig upp á skaftið

Dimma er búinn að vera í fimm ár hjá þeim hjónum og því orðin háð húsbóndum sínum, eins og tryggur hundur, að sögn Jóhanns. Á kvöldin sé hún yfirleitt í búri en hangi síðan með þeim hjónum á daginn og leiki sér í kringum húsið.

Hefur hún verið í samskiptum við aðra hrafna þarna í kring?

„Það er hrafnapar, staðbundið par á þessu svæði, sem hefur aðeins verið að ógna tilveru hennar. Hrafnarnir hafa verið að færa sig upp á skaftið og koma nær henni. Hún hefur sýnt að hún er hrædd við þá og haldið sig til hlés,“ sagði Jóhann.

„En ég hugsa að þeir væru búnir að drepa hana ef þeir ætluðu sér það. Mig grunar ekki þá, frekar tófuna.“

Næst á dagskrá er þá bara að leita betur?

„Athuga hvort ég finni fjaðrir eða finni hana á lífi,“ sagði Jóhann Helgi að lokum.

Eftir símtalið við blaðamann fóru þau hjón upp að Hellavatni. Sáu þau Dimmu hvergi en augljós merki um dýrbít og álftadráp. Þau fundu líka holu nálægt sem frá steig sterk lykt af minka- eða refaskít. 

Leitin að Dimmu heldur því áfram.