„Hann bók­staf­lega argar á mig þangað til ég fer fram úr“

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Vekjaraklukkan er stillt á 6:30 en þá er ég því miður oftast löngu vöknuð. Aldraður heimilisköttur, hann Kismundur, hefur ákveðið að við eigum að vera komin saman fram í eldhús ekkert mikið seinna en klukkan 5:30. 

Það er enginn snooze-takki á Kismundi og hann bókstaflega argar á mig þangað til ég fer fram úr.“

Hvað er það fyrsta sem þú gerir á morgnana?

„Hita sterkt kaffi og gef Kismundi smá G-mjólk, og honum og Litla Kisa morgunmat. 

Les fréttir og athuga hvort einhver skemmtileg rifrildi séu í gangi á Facebook, og reyni að hemja mig í að senda pósta þangað til klukkan er farin að ganga sjö, svo fólk haldi ekki að ég sé eitthvað lasin.

Fer í sturtu, bý til smoothie til að taka með í vinnuna og hjóla svo af stað.“

Hvaða lag kemur þér alltaf í geggjaðan stuðgír, söng eða dans?

„Það eru mörg lög sem koma mér í stuð og mjög erfitt að velja bara eitt. Ég og vinkonur mínar erum miklar stuðpíur og þó við séum á fimmtugsárinu látum við helst ekki gott stuð fram hjá okkur fara.

Undanfarið hef ég, þegar tækifæri gefst, verið að vinna með „Thunderstruck“ með AC/DC og „King Kunta“ með Kendrick Lamar. Tók „King Kunta“ um daginn í karíókí og var orðin svolítið móð undir lokin – aldurinn er farinn að segja til sín.“

Í hvaða verkefni ertu að vinna helst í þessa dagana?

„Það er alltaf fullt að gera hjá okkur. Ég er með frábæra stjórn og við höldum langa fundi með reglulegu millibili þar sem við ræðum afstöðu Eflingar til mála í stjórnmálum, efnahagsmálum og hreyfingu vinnandi fólks. 

Þar tökum við ákvarðanir um hverja við ætlum að rífast við næst („I got a bone to pick…“) og hvað við getum gert til að vinna sigra í baráttu verkafólks fyrir efnahagslegu réttlæti.

Efling er í átaki við að fjölga trúnaðarmönnum, sem gengur mjög vel og er liður í undirbúningi fyrir næstu kjarasamningslotu. Við höfum einnig gengið til liðs við UNI Global – alþjóðleg samtök verkafólks í ræstingum, umönnunarstörfum, öryggisbransanum og fleiru – sem innihalda 20 milljón manns í 150 löndum.

Við höldum umfangsmikil trúnaðarmannanámskeið í hverjum mánuði og erum í stöðugum samskiptum við félagsfólk Eflingar á almenna og opinbera markaðnum. Í desember höldum við risastórt jólaboð virkra félagsmanna og svo auðvitað alvöru íslenskt jólaball fyrir börn þessa frábæra Eflingarfólks sem heldur atvinnulífi höfuðborgarsvæðisins gangandi með vinnu sinni.“

Hvernig skipuleggur þú þig í vinnu?

Ég reyni að setja allt í dagatalið, sem ég skoða svo um það bil hundrað sinnum á dag. 

Stundum eru færslurnar mjög dularfullar; „senda póst á R“, og þá þarf ég að vona að ég muni hver R er og af hverju ég á að senda póst þangað.

Svona hef ég skipulagt mig síðustu ár og það hefur ekki enn gerst að ég fái reiðilegan póst frá R yfir því að ég hafi aldrei sent póstinn sem ég lofaði. Þannig að ég met það sem svo að mér gangi bara ágætlega að skipuleggja vinnuna og það sem ég á að gera.“

Hvenær ferðu að sofa á virkum kvöldum?

„Ég er á þeim stað í lífi mínu að á hverju kvöldi klukkan ellefu átta ég mig á því að klukkan er bara sjö. Ég reyni að gaufa eitthvað frameftir en er oftast sofnuð svo snemma að ég vil helst ekki tala um það.“