„Eiga eftir að hjálpa okkur helling og skila okkur miklu“

„Ég er sáttur með það hvernig við komum inn í þennan leik og hvernig við spiluðum, sérstaklega í fyrri hálfleik. Við kláruðum þetta nokkurn veginn þar og vorum á plani og pari.“

Spurður að því hvort að honum hafi þótt liðinu ná að takast að halda ákefðinni gangandi allan leikinn segir Arnar að það hafi vissulega verið kaflar þar sem leikur liðsins datt niður. Hann segist þó ekki ætla að dvelja við það. Hann sé ánægður með að liðið hafi náð markmiði sínu um að komast í milliriðil.

„Kannski ekki alveg en eins og ég segi þá hrósa ég þeim fyrir hvernig þær mættu í leikinn og hvernig heilt yfir við spiluðum þetta. Það eru kaflar í seinni hálfleik þar sem við hefðum getað gert betur en ég ætla ekki að horfa of mikið í þá. Ég er mjög ánægður að við höfum náð okkar markmiðum og gerðum það nokkuð sannfærandi. Við áttum tvo hörku leiki við tvær mjög góðar þjóðir í riðlinum sem eiga eftir að hjálpa okkur helling og skila okkur miklu.“

Það er ærið verkefni sem býður liðsins í milliriðli en þar verða andstæðingar liðsins, Spánn, Færeyjar og Svartfellingar. Hvernig leggst það í þjálfarann?

„Við vitum það að þetta eru allt sama þrælgóðar þjóðir og öflugar. Við þurfum að halda helst í það að horfa áfram á að læra, þroskast og stíga skref fram á við. Það sem við vildum var að komast áfram í milliriðla í fyrsta skipti og fá þessa leiki sem að við vorum að sækjast eftir til þess að halda áfram að læra og þróast... 

...Við eigum eftir að skoða þessi lið en strákarnir heima, Grétar, Halli og Anton eru búnir að klippa þetta fyrir okkur. Nú förum við á fullu að skoða þessa andstæðinga sem við vitum að eru mjög góðir en okkur hlakkar til að takast á við þá. Við ferðumst á morgun og svo er strax leikur á þriðjudaginn. Stelpurnar fá smá tíma núna til að vera með fólkinu sínu. Svo er bara kvöldmatur klukkan hálf níu og við byrjum undirbúning fyrir þessa þrjá leiki.“

Viðtalið má sjá í spilaranum að ofan.