Liðsfélagar í kasti við lögin og Cardi B flækt í málið

Christian Barmore er ákærður fyrir heimilisofbeldi sem á að hafa átt sér stað í ágúst síðastliðnum. Hann mun mæta fyrir dómstóla þann 3. febrúar, í sömu viku og úrslitaleikurinn um Ofurskálina fer fram.

Stefon Diggs er ákærður fyrir ofbeldi sem hann á að hafa beitt fyrrum einkakokki heimilis síns. Hún segir hann hafa kyrkt sig og barið, en leikmaðurinn sver af sér allar ásakanir og segir hana vilja plokka af sér peninga.

New England Patriots, sem eru búnir að tryggja sér sigur í AFC austur deildinni í fyrsta sinn síðan 2019, hafa gefið út yfirlýsingu þar sem segir að félagið standi með leikmanninum.

Kærasta hans, söngkonan Cardi B, hefur líka sýnt honum stuðning á samfélagsmiðlum og þvertekið fyrir að eiga þátt í málinu.

Samkvæmt konunni sem kærði Diggs fékk hún símtal frá kærustu hans, sem gerði lítið úr atvikinu og hótaði henni öllu illa ef hún myndi kæra.

Þar flækist málið töluvert, því Stefon Diggs hefur ekki verið við eina konu kenndur síðustu misseri.

Þau Cardi B opinberuðu sambandið í febrúar á síðasta ári og eignuðust sitt fyrsta barn saman í nóvember en í millitíðinni eignaðist Diggs barn með annarri konu og verið ítrekað sakaður um framhjáhald í fjölmiðlum.

Hann var líka gagnrýndur fyrir að verja jólahátíðinni ekki með Cardi B og nýfæddu barni þeirra, heldur með annarri barnsmóður sinni og afkvæmi þeirra.

Vandræðin eru þá ekki öll upptalin hjá Diggs því í gær var hann aftur kærður, af annarri konu, sem segir hann föður barns síns og fer fram á meðlagsgreiðslur.