„Erfitt að lýsa þessari stemningu sem við náðum upp í vörninni“

„Við grófum djúpt og fundum góðar lausnir. Einhvern veginn small bara allt saman. Allir sem komu inn áttu góða innkomu. Viktor gjörsamlega frábær. Arnar á frábæra innkomu eftir að hafa setið kaldur á bekknum, varnarlega gjörsamlega frábær. Ýmir var óaðfinnanlegur í dag, það var margt sem small hjá okkur“ sagði hinn hógværi Elliði svo og hrósaði liðsfélögum sínum í hástert.

Góður varnarleikur var lykillinn að sigrinum í dag og Elliði átti stóran þátt í því.

„Við sýndum bara mikil gæði. Þegar við misstum þá, þá var alltaf einhver kominn til að hjálpa. Það er erfitt að lýsa þessari stemningu sem við náðum upp í vörninni, hún var bara geggjuð.“

Stuðningurinn úr stúkunni spilaði líka stóran þátt í sigrinum en íslensku stuðningsmannasveitinni tókst nánast að kaffæra þeirri sænsku í hávaða.

„Ég hafði ekki endilega trú á því fyrirfram en við Íslendingar erum bilaðir og við bjuggumst kannski ekki heldur við því að vinna með átta mörkum. Þetta var gjörsamlega frábært og þau hjálpuðu okkur klárlega í dag. Ekkert nema þakklæti til þeirra.“