„Við reyndum og það bara gekk ekki“

Ómar, líkt og margir aðrir, átti góðan leik sóknarlega fyrir Ísland í kvöld, en það dugði ekki til. Niðurstaðan varð þriggja marka tap, 31-28, og Ísland leikur því um 3. sæti EM á sunnudaginn.

„Þeir bara spila sinn leik og eru sterkir. Mér fannst við spila heilt yfir nokkuð vel. Við vorum náttúrulega í erfiðum aðstæðum og kannski voru einhver atriði sem féllu ekki með okkur að okkar mati. En örugglega fór þetta bara eins og það átti að fara,“ sagði Ómar í leikslok.

Danska liðið var með um það bil tvöfalt fleiri löglegar stöðvanir en íslenska liðið í kvöld, en Ómar segist ekki pæla mikið í því.

„Við erum ekki mikið að pæla í því. Við erum meira að pæla í hvernig sóknirnar enda. Þeir eru bara þéttir varnarlega, en mér fannst við líka vera nokkuð solid í vörn. En þetta eru ekki alveg eins leikstílar og það kannski skýrir það.“

Ómar vildi þó ekki gefa of mikið upp þegar hann var spurður að því hvort einhverjir af þessum dómum hefðu mátt innihalda meiri refsingu.

„Það eru alltaf einhver vafaatriði, en það er bara eins og það er. Þeir eru örugglega ekki sáttir með einhver atriði. En þetta er allt í lagi.“

Þá var Ómar alveg með það á hreinu hvað hefði orðið til þess að Danir náðu upp fjögurra marka forskoti.

„Við kannski bara klúðrum og þeir skora. Þetta er bara svolítið þannig og þetta eru smáatriði hér og þar. Svo fá lið svona meðbyr og það kemur einhver orka í þá og höllin tryllist. Það er kannski bara það og þú mátt eiginlega ekki hleypa þeim í það. Þegar þetta er komið í 2-3 mörk þá verður þetta erfitt, en við reyndum og það bara gekk ekki.“

Framundan hjá íslenska liðinu er bronsleikur gegn Króatíu á sunnudaginn og Ómar segir að liðið geti tekið ýmislegt jákvætt með sér úr leik kvöldsins.

„Mér fannst við spila góðan leik og við vorum frekar solid bara heilt yfir þannig við mætum klárir eftir tvo daga,“ sagði Ómar að lokum.