HSÍ sam­mála sér­fræðingum og vill semja við Snorra

Snorri tók við landsliðinu í júní 2023 og samdi þá til þriggja ára. Hann hefur nú stýrt liðinu á þremur stórmótum og árangurinn farið stigvaxandi.

Þó að liðið hafi misst af verðlaunum á nýafstöðnu Evrópumóti þá komst það í undanúrslit stórmóts, í fyrsta sinn frá árinu 2010, og virðast sérfræðingar á einu máli um að réttast sé að Snorri haldi áfram með liðið. Hið sama segir formaður HSÍ, Jón Halldórsson, í samtali við RÚV í dag:

„Ég er rosalega ánægður með Snorra Stein, hann er á hárréttri leið með liðið. Það er mikill vilji hjá sambandinu að halda því samstarfi áfram,“ sagði Jón við RÚV.

Ákveðið hafði verið að ræða framhaldið eftir Evrópumótið og segir Jón að það verði því gert nú á næstu vikum.

Í hlaðvarpsþætti íþróttadeildar Sýnar, Besta sætinu, var rætt um samningsmál Snorra í síðasta þætti. „Mér fyndist það fáránlegt ef við ætlum að fara að breyta eitthvað til,“ sagði Rúnar Kárason og Einar Jónsson bætti við:

„Ég myndi gefa honum samning fram yfir Ólympíuleikana 2028. En það er ekki nóg að henda bara í samning. Það þarf að gera kröfur, þarf að setja markmið og allt það. Við erum komin á þann stað að það er hægt að gera það. Að sjálfsögðu ætti hann að fá samning allavegana fram yfir Ólympíuleikana 2028, engin spurning. Þetta lið er á virkilega góðri leið og mér finnst þetta engin spurning.“

Ásgeir Örn Hallgrímsson bætti svo um betur í Sportpakkanum á Sýn og sagði um sinn gamla félaga í landsliðinu:

„Mér finnst hann bara vera að ná tökum á liðinu núna og búinn að sýna árangur. Þá væri það algjör þvæla að fara að rugga því eitthvað og það á bara að drífa sig í að skrifa undir nýjan samning við hann.“

Næstu leikir Íslands verða vináttulandsleikir við Svíþjóð dagana 15.-21. mars, hér á Íslandi, en Ísland vann einmitt frábæran átta marka sigur gegn Svíþjóð á Evrópumótinu.

Árangurinn á EM skilaði bæði Íslandi og Svíþjóð öruggu sæti á HM í Þýskalandi í janúar á næsta ári og taka þau því ekki þátt í umspili fyrir það mót.