Eins leiks bann og sekt fyrir hnefahöggið

Mikla athygli vakti að Agravanis skyldi mega spila úrslitaleik bikarsins á laugardaginn, í tapinu gegn KR, þrátt fyrir hegðun sína í undanúrslitaleiknum gegn Keflavík í síðustu viku. Reglur um aga- og úrskurðarnefnd KKÍ eru hins vegar þannig að svona mál eru jafnan aðeins tekin fyrir á næsta vikulega fundi nefndarinnar og er það aðeins í úrslitakeppninni á vorin sem málin ganga hraðar fyrir sig.

Þess vegna var það ekki fyrr en í dag sem að niðurstaða fékkst í máli Agravanis sem eins og fyrr segir hlaut eins leiks bann og 40 þúsund króna sekt.

Það er í samræmi við grein 13 d) í reglum um aga- og úrskurðarnefnd, þar sem segir að viljandi líkamsmeiðingar eða tilraun til slíks kalli almennt á eins leiks bann og 40 þúsund króna sekt, í efstu deildum og bikarkeppnum meistaraflokka.

Agravanis missir af leik Stjörnunnar við Njarðvík annað kvöld í Garðabænum.

Uppfært: Í síðustu viku fékk Agravanis sekt upp á 20 þúsund krónur, meðal annars vegna brottrekstrarvillunnar gegn Keflavík. Það er vegna reglu 13 q) sem segir að safni leikmenn 4 tæknivillum á leiktíð þá hljóti þeir 20 þúsund króna sekt. Agravanis fékk tæknivillu og brottrekstrarvillu gegn Keflavík, og brottrekstrarvilla telst sem 2 tæknivillur. Hann var svo með tæknivillu á bakinu frá því fyrr á leiktíðinni.

Sektir vegna reglu 13 q) eru ekki í höndum aga- og úrskurðarnefndar sem skýrir hvers vegna þessi refsing var birt viku fyrr en bannið og 40 þúsund króna sektin.