74 prósent í­búða seldist á undir­verði í desem­ber

Frá þessu greinir í nýrri mánaðarskýrslu Húsnæðis- og mannvirkjastofnunar.

Alls var 1.080 kaupsamningum þinglýst í desember, þar af 319 samningum um fyrstu fasteignakaup. Vísitala íbúðaverðs hækkaði um 1,7 prósent í janúar eftir að hafa staðið í stað eða lækkað í þrjá mánuði. Íbúðaverð hækkaði um 2,36 prósent að nafnvirði milli janúar 2025 og janúar 2026 en vegna verðbólguþróunar hefur raunverð haldið áfram að lækka. Íbúðaverð hefur lækkað um 2,67 prósent að raunvirði undanfarna tólf mánuði.

Samkvæmt skýrslunni seljast nýjar íbúðir nú í auknum mæli undir auglýstu verði og hefur hlutfallið ekki verið hærra síðan um mitt ár 2023. 

Um 11.600 kaupsamningum var þinglýst árið 2025, þegar þrettánda hver íbúð gekk kaupum og sölu.

„Á höfuðborgarsvæðinu seldust um 7.800 eignir í fyrra, samanborið við tæplega 8.200 eignir árið áður. Þær voru þó nokkuð fleiri en á árunum 2022 og 2023 þegar á bilinu 6.200 til 6.500 eignir voru seldar á svæðinu. Rúmlega þúsund eignir voru seldar á Suðurlandi og á Norðausturlandi í fyrra, en í kringum 500 íbúðir á Vesturlandi. Á Austurlandi seldust 275 íbúðir, tæplega 200 á Vestfjörðum og um 100 á Norðvesturlandi,“ segir í skýrslunni.

Hér má finna skýrsluna.