„Það væri bara mjög hroka­fullt að vera ekki á­nægður“

„Það væri bara mjög hrokafullt að vera ekki ánægður eftir sigur á Haukum þannig að ég er mjög ánægður með frammistöðu liðsins og heildarbraginn,“ sagði Sigursteinn Arndal, þjálfari FH, eftir sigur liðsins í kvöld.

„Vörnin og markvarslan var mjög góð og hélt svona nánast allan leikinn. Það voru svo mjög langir kaflar þar sem við vorum mjög skynsamir og vel undirbúnir.“

Daníel Freyr Andrésson var frábær í marki FH í leiknum og var hann með 45% markvörslu og 17 varin skot. Jón Þórarinn Þorsteinsson kom svo inn á þegar líða fór undir lok leiksins en honum tókst að verja fimm skot af níu og var þá með 56% vörslu.

„Mér fannst frammistaðan hjá báðum mjög góð. Þeir eru báðir mjög góðir markmenn þannig að ég er mjög ánægður að hafa þá í mínu liði.“

FH mætir Haukum aftur í undanúrslitum Powerade bikarsins næstkomandi fimmtudag á Ásvöllum. Sigursteinn segist vera fullur tilhlökkunar og hvetur stuðningsmenn FH til að mæta og styðja við bakið á liðinu.

„Við ætlum að njóta kvöldsins og svo erum við að fara í gríðarlega erfiðan leik á móti Haukum aftur næsta fimmtudag í final four. Það er mikil tilhlökkun því ég þykist vita það að það verður stappfullt hérna og ég vil hvetja alla FH-inga til þess að flykkja sér á bak við okkur.“