Grínaðist í Antoni: „Við erum báðir rauð­hærðir“

Anton og Jónas dæmdu leik Svíþjóðar og Portúgals um 5. sætið, í Boxen í Herning, þar sem Portúgal vann á endanum sigur í spennuleik, 36-35.

EHF hefur nú birt lítið brot úr leiknum sem sýnir hve gott Anton á með að hafa stjórn á hlutunum þó að leikmenn æsi sig lítillega. Það gerðist þegar Gottfridsson fékk tveggja mínútna brottvísun í fyrri hálfleiknum.

Gottfridsson sýndi sömuleiðis mikla íþróttamennsku með því að biðja Anton afsökunar á að hafa æst sig, en kenndi reyndar hárlitnum um að ákveðnu leyti.

„Fyrirgefðu varðandi fyrri hálfleikinn. Stundum hitnar mér í hamsi. Ég er eins og þú. Við erum rauðhærðir. En við erum góðir, allt í lagi?“ sagði Gottfridsson léttur. „Já, ekkert mál,“ svaraði Anton.