Skorti orku og ást­ríðu

Landsliðsmenn fengu tveggja daga frí í síðustu viku hér á fróni áður en þeir komu saman til æfinga um helgina. Pedersen segir magnað hversu fljótir menn í íslenska hópnum séu að stilla saman strengi og æfingar hafi eftir því gengið vel.

„Þessi vika hefur gengið vel. Þessi hópur leikmanna komast sérstaklega hratt saman í rytma og komast á sömu blaðsíðuna. Þeir þekkja hvorn annan vel, hverjar tilhneigingar hvors annars eru. Þetta hefur smollið vel saman þessa fjóra daga af æfingum hingað til,“ segir Craig í samtali við Sýn.

Allir séu því í toppstandi.

„Einn kosturinn við landsliðsglugga um miðjan vetur er hversu góðu formi menn eru í. Við getum farið beint í hlutina sem við viljum gera. Við höfum æfingarnar stuttar og hnitmiðaðar.“

Sérstök staða í riðlinum

Í flestum riðlum undankeppninnar fyrir komandi heimsmeistaramót hafa línur tekið að skýrast eftir fyrstu tvo leikina sem fram fóru í lok nóvember. Sterkari lið vinna nokkuð örugga sigra á meðan önnur sitja eftir.

Einstök staða er í riðli Íslands, þar sem öll fjögur liðin eru jöfn að stigum, með þrjú talsins. Ísland fékk tvö stig fyrir frábæran útisigur á Ítalíu í fyrsta leik en fylgdi því eftir með slæmu tapi fyrir Bretum hér heima.

Litáen marði Breta með eins stigs mun í fyrsta leik en tapaði svo með eins stigs mun fyrir Ítölum. Ísland mætir nú Litáen heima og heiman í komandi leikjum. Í Laugardalshöll á föstudag og ytra á mánudag.

Hvernig blasir staðan í riðlinum við Craig?

„Við þurfum að einblína á einn leik í einu. Ef við vinnum báða leiki núna erum við ekki öruggir áfram en ef við töpum báðum erum við ekki úr leik heldur. Við tökum því bara einn leik í einu. Vonandi verður frammistaðan góð og orkumikil á föstudaginn áður en við horfum til næsta leiks eftir það.“

Renna blint í sjóinn

Ísland tapaði fyrir Litáen í æfingaleik fyrir EuroBasket í sumar en þá voru NBA-stjörnur Litáa með í för. Þeir leikmenn verða fjarverandi á föstudaginn og óvíst hversu margar stjörnur liðsins í Evrópu koma með til Íslands. Vera má að einhverjar þeirra spili aðeins síðari leikinn ytra.

Sama hvað, þá mætir sterkt litáískt lið hingað til lands.

„Litáen er körfuboltaþjóð með stóra púllíu leikmanna. Ef einhver dettur út þá kemur leikmaður inn úr úrvalsdeildinni á Spáni eða í Litáen. Þá vantar NBA-leikmenn sem mættu okkur í sumar, það munar um það. En þá koma gæðaleikmenn inn í staðinn. Við vitum ekki fullkomnlega hvernig hópurinn þeirra verður mannaður – en hann verður sterkur sama hvað,“ segir Craig.

Ástríða og orkustig

Eftir tapið svekkjandi fyrir Bretum hér heima eru menn ákveðnir í því að vinna sigur á heimavelli í þetta sinn. Craig segir orkustig og ástríðu, sem jafnan einkennir íslenska liðið, hafa skort gegn þeim bresku.

„Orkustigið var ekki á þeim stað sem það þurfti að vera á. Það þarf að bæta úr því á föstudaginn. Orkan og ástríðan er það sem þarf að vera til staðar frá byrjun, í allar 40 mínúturnar,“ segir Craig.

Viðtalið má sjá í spilaranum.