Tapaði hlaupinu af því að forystubíllinn lét hana hlaupa kol­ranga leið

Forystubíll leiddi hana, Emmu Grace Hurley og Ednah Kurgat út af brautinni þegar aðeins um þrír kílómetrar voru eftir.

Hin 34 ára gamla McClain hafði mikið forskot og virtist örugg með sigurinn en tapaði næstum því tveimur mínútum og féll niður í níunda sæti.

Missti af tveimur og hálfri milljón króna

Vegna þess missti hún af landsmeistaratitlinum og tuttugu þúsund dollara verðlaunafé samkvæmt opinberum úrslitum en það gera um tvær og hálfa milljón króna.

„Ég er enn að meðtaka þennan morgun en langar bara að þakka ykkur fyrir alla hlýjuna. Þetta er ekki „aumingja ég“ færsla. Ég er fullorðin kona og hef gengið í gegnum nóg í þessari íþrótt til að geta staðið upp aftur nokkrum sinnum,“ skrifaði McClain.

„Ég var að nálgast það sem ég hélt að væri síðasta mílan á bandaríska meistaramótinu í hálfmaraþoni þegar ég fylgdi lögreglumótorhjóli, opinberum forystubíl og mótorhjóli fjölmiðla út af brautinni í um þúsund metra,“ skrifaði McClain.

McClain var vissulega mjög súr og svekkt en fór varlega að láta reiði sína bitna á bílstjóranum sem klúðraði fyrir henni hlaupinu.

Virkilega ömurlegt fyrir alla

„Þetta er virkilega ömurlegt fyrir alla sem hlut eiga að máli. Enginn vill sjá svona niðurstöðu, aldrei. Mistök gerast og ég er viss um að þeim sem leiddu okkur líður hræðilega yfir þessu. Ég bara hata að það séu alltaf íþróttamennirnir sem gjaldi fyrir það (bókstaflega í peningum) aftur og aftur,“ skrifaði Jess McClain á samfélagsmiðla.

„Eitthvað þarf að breytast og það þarf að vera til staðar öryggisráðstafanir fyrir íþróttamenn sem eru þarna úti að gera sitt allra besta á keppnisdegi. Einhver þarf að láta sig þetta nógu miklu varða til að gera eitthvað, hvað sem er. Ég elska þessa íþrótt svo mikið og vil bara hjálpa til við að gera hana betri fyrir yngri atvinnumennina okkar og alla þá frábæru íþróttamenn sem koma munu,“ skrifaði McClain.

Reynir að verða besta útgáfan af sjálfri sér

„Ég hef lagt mikið á mig til að finna gleði í því að reyna að verða besta útgáfan af sjálfri mér og byggja upp sjálfsmynd sem er ekki bundin við eina frammistöðu eða niðurstöðu. Þetta hefur hjálpað mér að finnast ég sigra í hvert skipti sem ég fer yfir marklínu,“ skrifaði McClain.